Kocha Mkuu wa Yanga Mwinyi Zahera amewapongeza wachezaji wake kwa kuipigania timu kwenye mchezo wa jana kombe la Shirikisho dhidi ya Pyramids Fc licha ya kipigo cha mabao 2-1
Zahera amesema Yanga ilipoteza mchezo huo kwa bahati mbaya, lakini pia walikutana na timu ambayo ilikuwa bora zaidi yao
Zahera amesisitiza kuwa uongozi wa timu hiyo ulifanya uamuzi sahihi wa kubadili uwanja kutoka Taifa kwenda CCM Kirumba kwani uwanja haukuwa sababu ya wao kufungwa
"Mabadiliko ya uwanja haikuwa tatizo, " Zahera amewaambia waandishi wa habari muda mfupi baada ya kurejea jijini Dar es salaam
"Ukiangalia tumekosa bahati katika michezo hii. Angalia mchezo dhidi ya Zesco kule Zambia, goli la pili tulijifunga kwa bahati mbaya"
"Jana inatokea tena bahati mbaya, Ngasa aliwaza kama ukiuacha ule mpira utatoka, tumefungwa sababu ya bahati mbaya"
"Sasa kama wewe unafungwa kwa bahati mbaya, unafungwa na timu ambayo ni bora zaidi yako, huwezi kulalamika zaidi ya kukubali matokeo"
"Wachezaji wanastahili pongezi kwani walijitolea nguvu yao yote kuhakikisha timu inafanya vizuri lakini tumekosa bahati"
Yanga imerejea jijini Dar es salaam kuendelea na maandalizi ya mchezo wa marudiano ambao utapigwa Jumamosi, Novemba 03 nchini Misri
