Hatusajili hovyo hovyo - Mkwassa

Katibu Mkuu wa Yanga Charles Boniface Mkwassa amesema klabu hiyo imeachana na tabia ya kusajili wachezaji bila ya kuangalia mahitaji na mapendekezo ya kocha.

Mkwassa ametoa kauli hiyo wkaati ambapo kuwekuwa na maneno maneno kuwa 'ukata' ulioikumba klabu hiyo unafanya ishindwe hata kusajili wachezaji wapya.

“Tunafanya zoezi hili kwa mujibu wa ripoti ya mwalimu, hatutaki kusajili kwa sababu tumesikia timu nyingine zinasajili. Tunafanya mambo yetu kimya kimya na mwisho wa siku wapenzi na wanachama wa Yanga watafurahi na roho zao,”amesema Mkwasa.

Katibu huyo amesema Yanga ina maeneo madogo tu ya kubadilisha na haihitaji kubadilisha timu nzima kama zinavyofanya timu nyingine.

Pamoja na hayo, Mkwasa amesema tayari wamekwishamalizana na wachezaji watatu wapya, lakini kwa sasa wataendelea kufanya siri.

“Tumekwishasajili wachezaji watatu wapya tumewapa mikataba tena kwa maridhiano na klabu zao, sasa tunasubiri muda ufike tuwatangaze,”amesema Mkwassa.

Mkwasa amesema hawataki kukurupuka kutangaza mchezaji kabla ya dirisha la usajili halijafunguliwa rasmi na wachezaji hao pia hawajamaliza kabisa mikataba na klabu zao, ili wasije kuadhibiwa tena.

“Sisi tunatakiwa kuwa makini kidogo, yasije yakatupata yaliyotupata kama ya Kessy (Hassan) kwa sababu tulipigwa faini Sh. Milioni 50 kwa kusajili mchezaji bado wiki moja tu amalize kabla mkataba wake,” amesema.

Mkwasa alikuwa anakumbushia usajili wa beki Hassan Kessy msimu uliopita kutoka kwa mahasimu, Simba SC ambao waliingia naye mkataba na kuanza kumtumia akiwa amebakiza wiki moja kumaliza kabisa mkataba wake na klabu yake ya zamani, hivyo mwisho wa siku Shirikisho la Soka la Tanzania (TFF) likawapiga faini ya Sh. Miliomi 50.