Mlinda lango wa Yanga Metacha Mnata amekiri kuwa tangu ajiunge na timu hiyo amepata mafanikio katika kipindi cha muda mfupi jambo ambalo hakuwahi kulipata katika timu alizocheza mwanzo
Metacha alitua Yanga usajili uliopita akitokea klabu ya Azam Fc
Msimu uliopita aliitumikia Mbao Fc kwa mkopo
Mlinda lango huyo ambaye yuko timu ya Taifa, amesema licha ya presha kubwa anayoipata katika klabu ya Yanga kutokana na timu hiyo kuhitaji matokeo ya ushindi kwenye kila mchezo, Yanga imebadili maisha yake kutoka mtu wa kawaida na kuwa mtu maarufu
"Hii ni mara ya kwanza kwangu kucheza Yanga ni klabu kubwa, ina presha tofauti na timu nilizopitia kwa maana ya Azam FC na Mbao FC ambako mchezaji huwezi kuwa katika mawazo makubwa kama huku, lakini nimeanza kunufaika," Mnata amenukuliwa na Mwanaspoti
"Kupitia kujulikana najikuta baadhi ya mambo yangu ya kimaisha yanakwenda, hilo ni jambo linaloendelea kunipa moyo wa kupambana kuamini siku moja nitakuwa mtu wa tofauti katika soka la Tanzania"
Metacha amejiwekea malengo ya kupata mafanikio zaidi msimu huu licha ya kukabiliwa na ushindani mkali wa namba kutoka kwa mlinda lango wa Kimataifa wa Kenya, Farouk Shikalo
"Ugumu wa kazi ndio unaomtambulisha mtu kuwa bora, naendelea kujituma na kujifunza kwa wale ambao wamenitangulia kwa uzoefu, naamini utakuwa mzuri kwa upande wangu kutoka hatua moja kwenda nyingine"
Metacha ni miongoni mwa wachezaji wanne wa Yanga walioitwa timu ya Taifa inayojiandaa na mchezo wa Kimataifa wa kirafiki dhidi ya Rwanda ambao utapigwa Oktoba 14
Baadae wataelekea Uganda ambapo Oktoba 18 wataikabili Sudan kwenye mchezo wa marudiano kusaka tiketi ya michuano ya CHAN
