Mchezo wa ligi kuu ya Vodacom kati ya Yanga dhidi ya Polisi Tanzania umemalizika kwa timu hizo kugawana pointi baada ya kutoka sare ya mabao 3-3
Mchezo huo uliopigwa uwanja wa Uhuru, uliishuhudia Yanga ikilazimika kutokea nyuma kwa mabao mawili na kupata sare hiyo
Yanga iliuanza mchezo huo kwa kasi na iliandika bao la kuongoza mapema tu kwenye dakika ya 6 kupitia kwa Mrisho Ngasa aliyemalizia krosi murua ya Juma Abdul
Baada ya kufunga bao hilo, Yanga ilipunguza kasi na kuwapa nafasi wapinzani wao kutawala mchezo
Ditram Nchimbi akaisawazishia Polisi kwenye dakika ya 34 baada ya kuuwahi mpira uliokuwa ukielea langoni kwa Yanga
Katika kipindi cha pili, uzembe wa mabeki ukaruhusu Nchimbi afunge mabao mengine mawili ya haraka haraka kwenye dakika za 55 na 58
Kuingia kwa mabao hayo kuliiamsha Yanga ambayo ililishambulia mfululizo lango la Polisi
Mcongomani David Molinga 'Falcao' ambaye alikosa nafasi ya wazi kwenye kipindi cha kwanza, akafungua akaunti yake ya mabao akifunga bao la kichwa kwenye dakika ya 65
Dakika tatu baadae, Molinga akafunga bao safi kupitia mpira wa adhabu uliokwenda moja kwa moja kimiani
Matokeo ya mchezo huo yanaifanya Yanga iambulie alama moja tu baada ya kushuka dimbani mara mbili
Yanga itashuka tena uwanja wa Uhuru Jumapili, kuikabili Coastal Union
