Moja ya changamoto ambayo iliikabili Yanga kwenye mchezo wa juzi dhidi ya Rollers, ni kukosa maelewano mazuri hasa kwa safu yake ya ushambuliaji inayoundwa na wachezaji wote wageni
Sababu inayotajwa kupelekea changamoto hiyo ni wachezaji hao kutofanya mazoezi pamoja kwa muda wa kutosha
Wachambuzi mbalimbali wa soka nchini wanaamini kama Yanga ingepata muda mrefu zaidi wa kufanya mazoezi pamoja, mechi ya juzi dhidi ya Rollers ingekuwa nyepesi kwao
Changamoto hiyo aliidokezea hata kocha Mwinyi Zahera baada ya mchezo wa wiki ya Mwananchi dhidi ya Kariobangi Sharks
Zahera alisema timu yake haina muunganiko mzuri kutokana na wachezaji kutoanza mazoezi pamoja
Mcongomani huyo ndio maana ametaka apate michezo zaidi ya kirafiki ili aweze kutengeneza muunganiko huo
Michezo miwili dhidi ya Polisi Tanzania na AFC Leoprads ni kipimo cha kazi anayoifanya Zahera kwenye viunga vya mazoezi
Lakini pengine hili lilipaswa kufanywa mapema kwani ilifahamika wingi wa wachezaji wapya, timu ingehitaji muda zaidi wa maandalizi
Muingiliano wa ratiba ya michuano ya Afcon kwa kiasi kikubwa imevuruga mipango ya mazoezi ya timu nyingi ikiwemo Yanga
Lakini pia ni wakati sasa kwa uongozi wa Yanga kumuondolea Zahera majukumu ya timu ya Taifa, ili abaki na jukumu moja tu la kuifundisha Yanga
Ingawa kocha Mkuu wa DR Congo Florent Ibenge amejiuzulu, bado hatma ya Zahera kama kocha Msaidizi haijawekwa wazi na chama cha soka cha DRC
Uongozi wa Yanga unapaswa ukae nae chini, ili makubaliano yafikiwe aamue kubaki na majukumu ya Yanga tu hata kama ikitokea ametakiwa kuendelea na majukumu hayo ya timu ya Taifa
Kwani athari za kukosekana kwake hata kama ni wiki moja ni kubwa
