Baada ya msimu uliopita kukumbwa na changamoto eneo la ulinzi wa lango hasa baada ya Kakolanya kugoma, uongozi wa Yanga umesajili magolikipa wanne
Klaus Kindoki na Ramadhani Kabwili wameongezewa nguvu kwa kuletewa walinda lango wa Kimataifa Farouk Shikalo na Metacha Mnata
Mkufunzi mpya wa makipa Peter Manyika atakuwa na kazi ya kuamua nani awe kipa namba moja kulingana na ubora wa makipa hao
Manyika ambaye yuko kambini Morogoro akiwanoa Kindoki, Kabwili na Metacha, amesema kwa sasa hawezi kufahamu yupi anapaswa kuwa kipa namba moja
"Tumesajili makipa wanne, kwa sasa ninao watatu kambini, namsubiri huyo mmoja afike ili niweze kufahamu ubora wake," amesema
Shikalo bado hajatua kambini kwa kuwa alipewa mapumziko kutokana na ushiriki wake katika michuano ya Afcon akiwa na Kenya na kombe la Kagame akiwa na Bandari Fc
Hata hivyo Shikalo ndiye anatabiriwa kuwa huenda akawa mlinda lango namba moja wa mabingwa hao wa kihistoria
Lakini kuwa na makipa wote wenye ubora ni faida kwa klabu kwani wanaweza kupewa nafasi kwa zamu kulingana na mashindano ambayo timu inashiriki
