Beki Paulo Godfrey 'Boxer' amejumuishwa kwenye kikosi cha timu ya Taifa ya Tanzania 'Taifa Stars' ambacho Julai 28 kitaumana na Kenya katika mchezo wa kusaka tiketi ya kucheza fainali za CHAN kwa wachezaji wanaocheza ndani
Kocha Etinne Ndayiragije amefanya uamuzi sahihi wa kumjumuisha beki huyo mwenye kasi ambaye alin'gara zaidi kwenye ligi kuu msimu uliopita
Wengi wanaamini angeweza kujumuishwa hata kwenye kikosi kilichokwenda Misri kushiriki michuano ya Afcon
Wito huo umemuongezea ari Boxer ambaye kipaji chake kiliibuliwa na kocha Mwinyi Zahera aliyempandisha kutoka timu ya vijana ya Yanga kuchukua nafasi ya Hassani Kessy aliyetimkia Nkana Fc
"Nimefurahi kuitwa timu ya Taifa..nashukuru kocha ameniamini na nitaitumia nafasi hiyo kuipigania nchi yangu," amesema
"Pia nawashukuru benchi la ufundi la Yanga kwani wamenisaidia mpaka leo naweza kupata nafasi hii"
Hii mara ya kwanza kwa Boxer kujumuishwa kwenye timu ya wakubwa. Aliitwa kwenye kikosi cha U23 ambacho kilicheza na Burundi mwaka jana
