Wakati viongozi wa Yanga wakiwa 'busy' kukamilisha usajili wa timu hiyo kwa ajili ya michuano ya ligi ya mabingwa, siku nne zimebaki kwa zoezi hilo kufikia tamati
Juni 30 ndio siku ya mwisho kwa timu zinazoshiriki michuano ya CAF msimu ujao kuwasilisha vikosi vyao
Idadi ya wachezaji wanaoruhusiwa kuandikishwa ni 30, hata hivyo timu zinashauriwa kutosajili nafasi zote ili kuweza kuongeza wachezaji hatua ya makundi
Hatua ya awali timu inaweza kusajili kuanzia wachezaji 23 na kuendelea ambapo kwa timu ambayo haitajaza nafasi zote 30 inaweza kutumia nafasi zilizobaki kuongeza wachezaji kwenye hatua ya makundi
Kuanzia mwaka huu kalenda ya michuano ya CAF imebadilika ambapo itaanza mwezi wa nane na kufikia tamati mwezi wa tano mwakani
Michezo ya hatua ya awali itapigwa kati ya Agosti 9-11 na michezo ya marudiano kupigwa Agosti 23-25
Michezo ya raundi ya kwanza itapigwa kati ya 13-15 Septemba na michezo ya marudiano kupigwa 27-29 Septemba
Michezo ya hatua ya makundi itaanza kupigwa mwishoni mwa mwezi wa 11
Kutokana na mabadiliko hayo, kikosi cha Yanga kinapaswa kuingia kambini mapema ambapo uongozi wa timu hiyo tayari umetangaza kambi itaanza Julai 07
Hata hivyo Yanga huenda ikaanza kambi bila ya kocha wake Mkuu Mwinyi Zahera anayekabiliwa na majukumu ya timu ya Taifa huko Misri
Zahera atakosekana zaidi kama DR Congo itafuzu hatua ya mtoano.
Lakini anaweza kuiwahi kambi hiyo kama DR Congo haitavuka hatua ya makundi
Yanga pia itawakosa baadhi ya wachezaji wanaoshiriki michuano hiyo, hatma yao itategemea na hatua ambayo timu zao zitafika
