Mshambuliaji wa Polisi Fc ya Uganda Juma Balinya jana alikamilisha usajili wake wa kujiunga na Yanga baada ya kusaini mkataba wa miaka miwili
Mfungaji bora huyo wa ligi kuu ya Uganda msimu uliomalizika, alikamilisha usajili kabla ya kutambulishwa rasmi na Makamu Mwenyekiti wa Yanga Fredrick Mwakalebela kwenye tukio la Harambee ya kuichangia Yanga maarufu kama Kubwa Kuliko
Hata hivyo Balinya ilikuwa asajiliwe na Simba na inaelezwa alitarajiwa kutambulishwa jana saa saba mchana
Inaelezwa Simba ndio iliyogharamia ujio wa mshambuliaji huyo kutoka Uganda hata hivyo Yanga ikauteka mchakato na kumalizana nae 'juu kwa juu' na kuwaacha watani zao wakiwa wameduwaa wasijue cha kufanya
Usajili wa Balinya hautofautiani sana na usajili wa Abdulaziz Makame ''Bui' ambaye alisajiliwa na Yanga huku mkononi akiwa na nauli ya boti aliyokuwa ametumiwa na viongozi wa Simba!
Kilichotokea, Yanga walimtumia tiketi ya ndege wakati akijiandaa kwenda kupanda boti ambapo inaelezwa viongozi wa Simba walikuwa Bandarini wakisubiri kumpokea
Balinya na Bui wote walitambulishwa jana ukumbi wa Diamond Jubilee kwenye Kubwa Kuliko
Uongozi wa Yanga umetamba kuwa mpaka sasa wamewazidi ujanja wapinzani wao kwa kuwasajili wachezaji hao wakati Simba haikusajili mchezaji hata mmoja ambaye alikuwa kwenye mipango ya Yanga
Mlindalango Beno Kakolanya amesajiliwa na Simba lakini tayari Yanga walikuwa wameachana nae mwingine anayesubiri kutambulishwa ni Ibrahim Ajib ambaye pia Zahera amesisitiza hayumo kwenye hesabu zake
