Yanga inahitaji kuunda kitengo cha Uhamasishaji

Kwanza lazima nipongeze uteuzi wa Mkuu wa Kitengo cha Habari cha klabu ya Yanga, Dismas Ten ambaye yeye ni mchapakazi hasa.

Kwa kipindi kifupi chini yake tumeona mabadiliko makubwa kwenye mfumo wa upashanaji Habari kwa klabu ya Yanga.

Yanga sasa inafanya kazi kitaalamu zaidi kuliko ilivyokuwa chini ya Jerry Muro ambaye alifungiwa na TFF msimu uliopita na baadae Yanga kuamua kuachana nae.

Licha ya mafanikio hayo binafsi naona kuna jambo haliko sawa. Binafsi natamani ndani ya ofisi ya Bw, Ten kiundwe kitengo cha uhamasishaji ambacho kitakuwa na kiongozi wake mwenye sifa kama alivyokuwa Murro.

Hakuna ubishi kwenye swala la uhamasishaji Yanga imedorora sana sasa. Tumewapa nafasi wapinzani wetu kutawala kila mahali.

Tumekuwa wanyonge mno. Haji Manara amekosa mtu wa kumchallenge katika kazi yake.

Wakati Yanga inakwenda kupambana na Simba kwenye mchezo wa Ngao ya Jamii niliushuhdia uwoga mwingi kwa mashabiki wa Yanga kabla ya mchezo huo.

Hii ilitokana na vitisho vya upande wa pili. Wenzetu wanajua umuhimu wa Propaganda, sio jambo la kupuuzwa hata kidogo.

Vyama vya siasa vinaunda mpaka vitengo vya propaganda! Enzi za Jerry Murro mashabiki walimpenda sana kwa sababu alikuwa anafahamu vyema kazi yake.

Murro alisababisha mpaka Manara akawa mpole wakati fulani! Alikuwa na uwezo wa kuwahamasisha mashabiki kupitia vyombo vya habari na wakajitokeza kwa wingi kuishangilia timu.

Kwa hakika Yanga inahitaji mtu wa aina hii. Tuondoe huu unyonge kwa mashabiki wa Yanga.