Kocha Mkuu wa Yanga Mwinyi Zahera amesema wanafanya maandalizi kabambe kwa kila mchezo wanaoshuka dimbani akitambua kila mchezo kwao ni kama fainali.
Zahera aliyetua Yanga mwishoni mwa msimu uliopita, amefanya maajabu msimu huu kwa kuiongoza Yanga kushinda michezo 18 kati ya 23 iliyocheza kwenye ligi kuu ya Tanzania licha ya mwanzoni kutopewa nafasi ya kufanya vizuri
Mcongomani huyo amesema baada ya mafanikio hayo timu yake imekuwa ikikamiwa na kila timu wanayokutana nayo.
"Kila mchezo tunaocheza ni kama fainali. Tunatambua ugumu uliopo mbele yetu na tumekuwa tukifanya maandalizi ya kutosha," amesema
Akizungumzia maandalizi ya mchezo dhidi ya Simba utakaopigwa Jumamosi ijayo katika dimba la Taifa, Zahera amesema mchezo huo ni wa kawaidia na maandalizi yake hayana tofauti na michezo mingine.
Amesema tofauti iliyopo ni kwa kuwa mchezo huo unazikutanisha timu zenye upinzani wa jadi ndio maana presha ni kubwa
"Nimebaini hapa Tanzania mchezo wa Simba na Yanga una presha kubwa sana. Viongozi wamekuwa wakiuzungumzia mchezo huo zaidi wakati tukijiandaa na michezo mitatu iliyopita," amesema
"Lakini kwangu mimi mchezo huu ni wa kawaida, tutajiandaa vizuri na lengo letu ni kushinda"
Katika mchezo huo utakaopigwa Jumamosi saa 11 jioni, Yanga itakuwa na deni kwa mashabiki wake kuhakikisha inapata ushindi ili kuendelea kujiimarisha kileleni mwa msimamo wa ligi
Licha ya Simba kuwa na viporo vingi, wakipoteza mchezo wa Jumamosi huenda ikawa mwanzo wa wao kuliachia taji la ligi kuu.
Yanga inahitaji kufuta uteja kwa Simba kwani katika michezo ya misimu ya hivi karibuni Simba imetawala huku ushindi wa Yanga ukiwa ni matokeo ya sare
Mara ya mwisho Yanga kuifunga Simba kwenye michuano yote ilikuwa msimu wa 2015/16 wakati huo ikinolewa na Hans van Pluijm ambaye sasa ni kocha wa Azam Fc
Katika msimu huo Yanga ilishinda mabao 2-0 katika michezo yote miwili ya ligi
