Mlinda lango wa Yanga Beno Kakolanya amesema amemwachia Mwanasheria wake kumalizana na timu hiyo kuhusu ajira yake
Kumekuwa na shauku kubwa miongoni mwa mashabiki wa Yanga ambao wengi wangependa kumuona Beno akiendelea na majukumu yake katika klabu hiyo
Juhudi zimekuwa zikifanyika kumaliza tofauti iliyojitokeza baina yake na mkufunzi wa Yanga Mwinyi Zahera ambaye ameendelea kushikilia msimamo wake wa kutomuhitaji
Hata hivyo Kakolanya nae amevunja ukimya kwa kusema hatma yake ameiacha mikononi mwa Mwanasheria wake ambaye tayari amekutana na uongozi wa Yanga mara kadhaa
"Siwezi kuongelea lolote kuhusu ajira yangu maana hilo swala nilishamkabidhi Mwanasheria wangu analishughulikia, nipo kimya sitaki kuliongelea ila hivi karibuni atawataarifu nini hatma ya swala hili," amesema Beno
Ingawa hakuweka wazi nini kinashughulikiwa na Mwanasheria huyo, lakini inafahamika uongozi wa Beno uliiandikia barua klabu ya Yanga ukiomba kuvunjwa kwa mkataba wake
Barua hiyo iliandikwa wakati Beno alipogoma kushinikiza alipwe stahiki zake.
Mwanasheria wa Beno ameweka msisitizo wa kuitaka klabu ya Yanga imuachie mteja wake kwa kuwa ameendelea kukaa nje hali inayohatarisha kipaji chake
Huenda uongozi wa Yanga ukalazimika kufanya maamuzi haraka au jambo hilo litaenda kumalizwa Mahakamani
Wakati huo huo baadhi ya wadau wameitaka klabu ya Yanga ifanye uamuzi ili kuepuka makundi yaliyoanza kujitokeza miongoni mwa mashabiki wa klabu hiyo
Lipo kundi linalomuunga mkono Kocha Mwinyi Zahera kwa uamuzi wake wa kukataa kumrejesha Beno kikosini baada ya kuchukizwa na utaratibu alioutumia kujiondoa , wakati kundi la pili linapingana na uamuzi huo wakishinikiza mlinda lango huyo arejeshwe kutokana na kutoridhishwa na viwango vya walinda lango waliopo
Uongozi wa Yanga umetakiwa uamue moja ili kumaliza sintofahamu hiyo ambayo imeanza kuutafuna umoja uliopo
Aidha wapo wasioitakia mema Yanga ambao pia wanatumia mgogoro huo kuwachochea WanaYanga ili wamchukie kocha wao Mwinyi Zahera hali ambayo itaigharimu timu hiyo zaidi iwapo kocha huyo ataamua kuondoka
