Wakati kikosi cha vijana cha Yanga leo kikitarajiwa kushuka dimba la Amaan visiwani Zanzibar kuikabili Malindi Fc kwenye mchezo wa kombe la Mapinduzi, wachezaji wa kikosi cha kwanza wanaendelea na mazoezi kujiandaa na michezo ya ligi kuu pamoja na michuano ya SportPesa Super Cup
Uamuzi wa kukigawa kikosi cha Yanga ulichukuliwa na kocha Mkuu wa timu hiyo Mwinyi Zahera kuhakikisha Yanga haiathiriwi na wingi wa michuano inayoshiriki katika mwezi huu wa kwanza.
Kikosi cha kwanza kimeendelea kujifua kwenye uwanja wa chuo cha Polisi Kurasini jijini Dar es salaam kujiandaa na mchezo wa kiporo dhidi ya Azam Fc ambao utapigwa punde baada ya kumalizika michuano ya kombe la Mapinduzi.
Kuelekea mchezo dhidi ya Malindi Fc kwenye michuano ya kombe la Mapinduzi, Meneja wa Yanga Nadir Haroub 'Cannavaro' amesema baada ya kupoteza mchezo dhidi ya Azam Fc, leo wamedhamiria kushinda dhidi ya Malindi ili waweke hai matumaini ya kutinga nusu fainali ya michuano hiyo.
