Kocha Mkuu wa Yanga Mwinyi Zahera amesema ametembea nchi nyingi barani Afrika lakini hakuona ushabiki wa soka wa aina yake kama uliopo hapa Tanzania.
Zahera aliyazungumza hayo jana mbele ya waandishi wa habari baada ya kushangazwa na idadi kubwa ya mashabiki wa klabu ya Yanga aliowaona timu hiyo ilipokwenda kucheza mikoani.
Zahera aliwasifu mashabiki wa Yanga na kusema ni kipekee
Zahera amesema hata kwao DR Congo timu kubwa kama TP Mazembe ina mashabiki wengi katika jiji la Lubumbashi tu lakini ikitoka nje ya mji huo haipati uungwaji mkono wa aina hii alioshuhudia hapa Tanzania kwa timu za Yanga na Simba.
"Kule kwetu Congo TP Mazembe ikicheza Lubumbashi mashabiki wake wanajaza uwanja lakini ikitoka nje ya mji haina hata mashabiki 10 wa kuiunga mkono," alisema Zahera.
"Lakini zikicheza FC Barcelona na Real Madrid utasikia mji mzima ukirindima pale moja ya timu hizo inapofunga bao. Lakini hapa Tanzania ni tofauti sana, mashabiki wanapenda sana Yanga na Simba"
Zahera amefichua kuwa moja ya mambo yanayomfanya afurahie kufanya kazi katika klabu ya Yanga licha ya changamoto za kiuchumi zinazoikabili klabu hiyo ni upendo wa mashabiki kwa timu yao na ushirikiano anaopata kutoka kwa mashabiki hao.
