Mpaka sasa tunaweza kusema uongozi wa Yanga umeshindwa kubuni mpango mkakati wa kuhakikisha timu inanufaika na mapato ya mauzo ya jezi zenye nembo ya klabu hiyo.
Tangu mwanzoni mwa msimu mashabiki wa timu hiyo wameomba uongozi kuweka hadharani utaratibu au maeneo ambayo wanaweza kununua jezi ili kuiongezea timu mapato.
Jana kwenye mchezo wa kombe la FA dhidi ya Tukuyu Stars Yanga imetambulisha jezi aina nyingine, pengine hilo linaweza kuwa toleo la sita msimu huu. Hali hiyo pia inawachanganya mashabiki kwani wanashindwa kufahamu zipi ni jezi maalum za Yanga msimu huu?
Lakini jambo la msingi hapa ingefaa kuwepo utaratibu (uliotangazwa na uongozi) kuwawezesha mashabiki wanaotaka kununua jezi halisi za klabu kuzipata kwa urahisi.
Usiri huu unawafanya baadhi kuhofia kuwa isije ikawa mpango huo wa jezi unaratibiwa na kuwanufaisha watu wachache ambao pengine ni viongozi wa klabu hiyo.
Pengine viongozi watakaopatikana kwenye uchaguzi wa Januari 13 walifanye hili kuwa ajenda yao namba moja.
Wakati huu mashabiki wanaaswa kuichangia timu ili iweze kusafiri, lakini mashabiki hawa kila siku wamekuwa wakiuomba uongozi uwape utaratibu wa KUNUNUA jezi za timu hiyo bila ya mafanikio.
Hivi kuna njia gani rahisi ya kuiongezea klabu mapato zaidi ya kuuza jezi na bidhaa nyingine ndogondogo za klabu?
Ni vyema uongozi wa Yanga ukajitokeza hadharani kubainisha utaratibu wanaotumia kuuza jezi za klabu hiyo ili kuwaondoa wasiwasi mashabiki na wanachama wake.
Pia waweke hadharani mauzo ambayo yamepatikana tangu kuanza kwa msimu huu. Wanachama wana haki ya kuhoji na kupewa takwimu hizi na isionekane wanaohoji kuwa wanachuki na viongozi waliopo
Timu inahitaji fedha na tayari ina vyanzo vya mapato mkononi ambavyo inaonekana kama havitumiwi ipasavyo ili kuiongezea timu mapato.
