Stars inahitaji ushindi tu leo

Kikosi cha timu ya Taifa ya Tanzania 'Taifa Stars' leo kinashuka kwenye uwanja wa Taifa kuikabili Cape Verde katika mchezo wa kusaka tiketi ya kutinga fainali za michuano ya AFCON 2019.

Stars inashika nafasi ya nne kundi L ikiwa na alama mbili lakini ushindi katika mchezo wa leo unaweza kuipeleka hadi nafasi ya pili kutegemeana na matokeo ya mchezo kati ya Lesotho dhidi ya Uganda.

Ukiiacha Uganda ambayo iko katika nafasi nzuri zaidi ya kufuzu, Cape Verde, Tanzania na Lesotho zina nafasi sawa kimahesabu katika kuwania nafasi nyingine iliyobaki.

Timu mbili kutoka kila kundi zitafuzu kwa fainali za AFCON 2019 zitakazofanyika mwezi Juni nchini Cameroon baada ya CAF kuongeza idadi ya timu kutoka 16 hadi 24.

Baada ya mchezo wa leo, Stars itakuwa na mchezo mwingine ugenini dhidi ya Lesotho mwezi ujao.

Ushindi katika mchezo wa leo na ushindi katika mchezo mwingine wa nyumbani dhidi ya Uganda ni matokeo ambayo yataiweka Stars katika nafasi nzuri ya kufuzu

Matokeo tofauti na ushindi kwenye mchezo wa leo yatafifisha matumaini ya kufuzu kwa michuano hiyo ambayo Tanzania ilishiriki kwa mara ya mwisho miaka 38 iliyopita.

Watanzania wameaswa kujitokeza kwa wingi uwanja wa Taifa leo katika mchezo huo unaotarajiwa kuanza saa 11 jioni.

Viingilio vya mchezo huo ni Tsh 2,000/- Mzunguuko wakati Majukwaa yote ya VIP ni Tsh 10,000/-