Bossou atishia kuishitaki Yanga FIFA

Mlinzi wa zamani wa Yanga Vicent Bossou amesema anakusudia kupeleka malalamiko kwenye shirikisho la soka duniani (FIFA) kama hatalipwa madai yake ya mishahara ya miezi miwili.

Kwa mujibu wa mtandao wa BIN ZUBEIRY, Bossou kupitia kwa wakala wake Mganda Gibby Kalule, amesema kwamba viongozi wa Yanga, Katibu Mkuu Charles Boniface Mkwasa na Mhasibu, Baraka Deusdedit wamekuwa wakipuuza jitihada zake za kudai malimbikizo yake hayo hata baada ya kuondoka.

Bossou amesema ametuma barua pepe kwa Katibu Mkuu, Mkwasa pamoja na Mhasibu wa Yanga Deusdedit, anasubiri majibu kwa viongozi hao kabla hajachukua hatua zaidi.

“Nasubiri wanijibu barua yangu na kunilipa fedha zangu iwapo wakishindwa kufanya hivyo meneja wangu atachukua hatua zaidi,” alisema Bossou.



Uongozi ni vyema ukamalizana na mchezaji huyo kama madai yake ni ya kweli. Bossou ameitumikia Yanga kwa mafanikio makubwa, haina haja ya kupelekana FIFA.

Kwa hakika kuna ulazima wa Yanga kubuni vyanzo vipya vya mapato haraka iwezekanavyo ili kujinusuru na haya yanayotokea sasa.

Kipindi hiki ni kigumu sana kwa viongozi wa Yanga wakiongozwa na Katibu Mkuu, natumai wataivusha timu salama.