Tshishimbi kutua wakati wowote

Kiungo mkabaji aliyesajiliwa na Yanga kutoka Mbabane Swallows, Papi Kabamba Tshishimbi anatarajiwa kutua jijini Dar es salaam wakati wowote.

Taarifa za uhakika ambazo zimethibitishwa na Afisa wa Habari wa Yanga Dismas Ten ni kuwa uongozi wa Yanga uliridhia kumpa mapumziko ya siku kadhaa kiungo huyo kutokana na ushiriki wake kwenye michuano ya kombe la shirikisho hatua ya makundi.

Tshishimbi alitarajiwa kuwasili jana Jumamosi mchana kwa mujibu wa taarifa iliyotolewa na Katibu Mkuu Charles Mkwasa lakini alishindwa kujua atawasili saa ngapi baada ya kupoteza mawasiliano naye.

Mapema jana waandishi wa Habari walifurika uwanja wa ndege wa kimataifa wa julius Nyerere kumsubiri kiungo huyo

Mbabane Swallows ilitinga hatua ya makundi michuano kombe la shirikisho barani Afrika Tshishimbi akiwa mmoja wa wachezaji wa kutegemewa wa timu hiyo, alicheza michezo yote.

Yanga imekamilisha usajili wa mchezaji huyo kutoka Mbabane Swallows baada ya kuvunja mkataba wake wa miezi minne iliyokuwa imebaki na klabu hiyo ya Swaziland.

Tshishimbi alionekana na Yanga kwa mara ya kwanza kwenye michuano ya kombe la shirikisho barani Afrika wakati Mbabane Swallows ilipokuja Tanzania kucheza na Azam FC.

Alikuwa akifuatiliwa na uongozi wa Yanga tangu wakati huo.

Umahiri wake katika nafasi ya kiungo mkabaji unatarajiwa kumaliza kabisa tatizo hilo katika klabu ya Yanga