Nsajigwa akomaa na safu ya ulinzi

Leo asubuhi Yanga imeendelea na mazoezi ya kujiandaa na msimu mpya kwenye dimba la Polisi Kurasini jijini Dar es salaam.

Mwalimu Lwandamina akisaidiana na Shedrack Nsajigwa waliwaongoza vijana katika program maalum.

Kikosi hicho cha Lwandamina kitakuwa na kibarua kizito cha kutetea ubingwa wake wa Ligi Kuu Bara kuanzia Agosti 27 itakapocheza dhidi ya Lipuli kwenye Uwanja wa Taifa.

Yanga ilianza maandalizi ya msimu mpya kwa kufanya mazoezi ya Gym jijini Dar es salaam kabla ya kwenda mkoani Morogoro ambapo waliendelea na mazoezi ya kujenga utimamu wa mwili kwa kukimbia na mapalashuti.

"Tumejiandaa na tunaweza kuanza ligi, ni wazi kuwa msimu huu utakuwa na ushindani mkubwa kwa sababu timu nyingi zimejiandaa na hata kusajili vizuri," amesema Lwandamina.

Katika mazoezi ya leo asubuhi kwenye Uwanja wa Polisi Kurasini, Nsajigwa alikuwa akitilia mkazo namna ya ukabaji.

Yanga inajiandaa na mchezo wa Ngao ya Jamii dhidi ya Simba utakaofanyika Agosti 23, jambo lililomfanya Nsajingwa kuwa mkali kwa makosa ya kizembe yaliyokuwa yakifanywa na mabeki wake.

Mara zote Nsajigwa alionekana kuwa mkali kwa makosa hayo na kulazimika kukaa na mchezaji mmoja mmoja ili kutoa maelekezo.