Koukpo katimka lakini Mcongo mambo safi

Baada ya kutimka mshambuliaji raia wa Benin Marcelin Koukpo, Mcongo Heritier Makambo huenda akamwaga wino Jangwani imefahamika.

Jana Yanga iliendelea na mazoezi kwenye chuo cha Polisi Kurasini jijini Dar es salaam ikiwa na makundi mawili ya wachezaji, wapya wanaofanya majaribio na wale ambao walikuwa Yanga tangu msimu uliopita.

Makambo aliyetua na Zahera wiki iliyopita amekuwa akionyesha kiwango kizuri kwenye mazoezi huku akionekana yuko 'fiti' kwa kumudu ipasavyo mazoezi anayopewa.

Makambo jana alijumuishwa kwenye kikosi cha wachezaji walioitumikia Yanga msimu uliopita. Hii ni dalili kuwa mchazaji huyo tayari amefuzu majaribio.

Kuondoka kwa Koukpo kumeibua sintofahamu miongoni mwa mashabiki wa Yanga lakini ukweli ni kwamba kocha Mkuu wa timu hiyo Mwinyi Zahera hakuridhishwa na uwezo wake.

Inaelezwa Koukpo hakumvutia kabisa Zahera kwani hakuwa akimudu mazoezi aliyokuwa akitoa tofauti na wenzake waliokuwa wakijaribiwa naye.

Baada ya shinikizo la kusajiliwa kukwama, Kuokpo anadaiwa kuondoka kimyakimya bila kuaga licha ya kuwa aliahidi kuhudhuria mazoezi jana.

Taarifa zaidi zinabainisha kuwa Koukpo alikaribia kusajiliwa kabla ya Zahera kumuwekea ngumu kwani tayari alikuwa ameshafanyiwa vipimo vya afya.