Hatukuwahi kuzungumza na Kagere, Wawa - Nyika

Mwenyekiti wa Kamati ya usajili ya Yanga Hussein Nyika amesema timu hiyo haikuwahi kuwa na mpango wa kuwasajili Meddy Kagere aliyesajiliwa na Simba jana akitokea Gor Mahia na Paschal Wawa ambaye anafanya majaribio katika klabu hiyo.

Nyika ameeleza kushangazwa na taarifa zinazodai wamezidiwa ujanja wa watani zao ambao wamekuwa wakiwasajili wachezaji wanaofanya nao mazungumzo.

"Ifahamike sisi hatushindani na timu yoyote kusajili. Tunachofanya ni kutafuta wachezaji wanaofaa ili tujenge timu imara," amesema Nyika.

"Hatujawahi kuwa na mazungumzo na wachezaji hao. Hizo ni taarifa tu ambazo zilikuwa zikiripotiwa na vyombo vya habari lakini hazikuwa na ukweli wowote," amesisitiza Nyika.

Akizungumzia hatma ya usajili wa klabu hiyo, Nyika amesema mchakato unaendelea vizuri na anaamini Yanga itakuwa na kikosi imara msimu ujao.

"Sisi tunaendelea na usajili bila ya kutangaza wachezaji hadi pale tutakapokamilisha zoezi zima. Ukimya wetu haumaanishi kwamba hatufanyi kitu."

"Wapenzi na wanachama wetu wawe watulivu. Wafahamu viongozi wao tuko makini na tutatoa taarifa baada ya kukamilisha kila kitu"

Yanga imeanza mazoezi jana ikiwa na idadi kubwa ya wachezaji wa kigeni waliofika kufanya majaribio.

Mazoezi hayo yanaendelea leo katika uwanja wa chuo cha Polisi Kurasini jijini Dar es salaam.