Kocha msaidizi wa Yanga SC, Simo Dladla, ameachana na mabingwa hao wa Tanzania Bara na anatarajiwa kurejea nchini Afrika Kusini kuinoa klabu ya Richards Bay FC inayoshiriki Ligi Kuu ya Betway Premiership.
Kwa mujibu wa taarifa iliyochapishwa na mtandao wa FARPost wa Afrika Kusini, Dladla na Yanga wamefikia makubaliano ya kuvunja mkataba wao, huku kocha huyo akiwa tayari amekubaliana na Richards Bay kuhusu kuiongoza timu hiyo.
Dladla alijiunga na Yanga Julai mwaka huu akiwa msaidizi wa kwanza wa Manqoba Mngqithi, ambaye baadaye aliondolewa katika nafasi ya ukocha mkuu kufuatia sare ya bila kufungana dhidi ya TRA United.
Baada ya kuondoka kwa Mngqithi, Dladla alikabidhiwa jukumu la kuinoa Yanga kwa muda, akifanikiwa kushinda michezo yote miwili aliyosimamia katika Ligi Kuu Tanzania Bara.
Katika mchezo wake wa kwanza, Oktoba 27, aliiongoza Yanga kupata ushindi wa mabao 2-1 dhidi ya Mashujaa FC kabla ya kuichapa Kagera Sugar mabao 4-0, Novemba 1.
Mabadiliko benchi la ufundi Yanga
Awali, Dladla alitarajiwa kuendelea kuwa sehemu ya benchi la ufundi la Yanga chini ya kocha mkuu mpya, Fadlu Davids, lakini sasa ameamua kurejea nchini kwao.
Kuondoka kwake kunaendeleza mabadiliko katika benchi la ufundi la Wananchi kufuatia ujio wa Davids, ambaye ameongeza makocha wasaidizi Darian Wilken na ndugu yake, Maahier Davids.
Dladla anaungana na Tshepang Mokaila na Thulani Thekiso, ambao pia walikuwa sehemu ya benchi la ufundi la Mngqithi kabla ya kuondoka Yanga.