Kocha Mkuu wa Yanga, Fadlu Davids, ameanza kuingiza sura mpya ya uchezaji ndani ya kikosi hicho, akisisitiza soka la kasi, pasi za uhakika na kufanya maamuzi kwa haraka katika mazoezi ya kambi ya Zanzibar.
Fadlu ameanza kazi kwa vitendo tangu kuwasili visiwani humo kwa kambi maalumu ya siku 10, akionyesha wazi aina ya soka analotaka kulijenga Jangwani katika kipindi chake cha uongozi.
Katika mazoezi ya awali yaliyofanyika kwa siku 2, kocha huyo alielekeza nguvu kubwa kwenye mazoezi ya kutumia koni, ambapo wachezaji walitakiwa kuongeza kasi ya kukimbia, kubadilisha mielekeo na kucheza pasi kwa usahihi ndani ya muda mfupi.
Ujumbe wake unaonekana kuwa wazi: hataki Yanga inayopoteza muda kuzungusha mpira bila madhumuni, bali timu inayoweza kuusafirisha mpira kwa haraka, kutafuta nafasi na kufanya maamuzi sahihi katika mazingira yenye presha.
Tofauti na makocha wanaopendelea kusimamia mazoezi wakiwa pembeni, Fadlu alionekana kuwa karibu na wachezaji muda wote, akifuatilia utekelezaji wa maelekezo na kusimamia kila zoezi kwa umakini.
Alisisitiza nidhamu, kasi ya mchezo na usahihi wa pasi, vitu vinavyoashiria kuwa anataka kujenga timu yenye uwezo wa kutawala mchezo kupitia matumizi mazuri ya mpira.
MZIZE APATA MAELEKEZO MAALUMU
Katika mazoezi hayo, mshambuliaji Clement Mzize alikuwa miongoni mwa wachezaji waliopata uangalizi wa karibu kutoka kwa kocha huyo.
Fadlu alimuita pembeni na kumpa maelekezo ya ziada, ishara kwamba mbali na kujenga mfumo wa jumla wa timu, anataka pia kuboresha mchango wa kila mchezaji kulingana na nafasi na majukumu yake uwanjani.
Kocha huyo anaamini kuwa kikosi kina vipaji na uwezo wa kufanya vizuri, lakini kila mchezaji atalazimika kuonyesha ubora wake kupitia juhudi, kujituma na kufuata falsafa ya benchi la ufundi.
Akizungumzia maandalizi hayo kabla ya safari ya Zanzibar, Fadlu alisisitiza umuhimu wa kuanza kazi mapema na kutaka wachezaji waonyeshe kiwango cha juu katika kila kipindi cha mazoezi.
