Soka la Tanzania halijawahi kuacha kushangaza, na safari hii limeleta mtikisiko mwingine mkubwa. Aliyekuwa Kocha Mkuu wa Simba SC na Raja Casablanca, Fadlu Davids, raia wa Afrika Kusini, anatajwa kurejea nchini kwa mara nyingine.
Lakini wakati huu, hatatua Msimbazi; makazi yake mapya ni Jangwani akichukua mikoba ya Manqoba Mngqithi ndani ya klabu ya Yanga.
Uamuzi huu wa Yanga kumuajiri kocha huyo amewastua wengi hasa kutokana na umataduni wa timu hizi mbili, Yanga na Simba.
Fadlu alifanya kazi kwa mafanikio na klabu ya Simba akiisaidia timu hiyo kucheza fainali ya kombe la Shirikisho (CAFCC) katika msimu wake wa kwanza.
Baada ya msimu mmoja tu, akatimkia Raja CA ambako awali alihudumu kama kocha msaidizi kabla ya kuajiriwa na Simba.
AKiwa na Raja CA, Fadlu hakuweza kumaliza msimu akipewa mkono wa kwaheri mwishoni baada ya miamba hiyo ya Morocco kupoteza nafasi ya kutwaa ubingwa.
Nini hasa kitarajiwe kutoka kwa Fadlu Davids ndani ya Yanga?
1. Mapinduzi ya Soka la Kuvutia na Kujenga Vijana
Akiwa na Simba SC katika msimu wa 2024/25, Fadlu Davids alijipatia sifa nyingi kutokana na falsafa yake ya soka la pasi fupi fupi na kuvutia, huku akionyesha muundo thabiti wa kiulinzi na kushambulia kwa kasi. Moja ya sifa zake kubwa ni upendo wake wa kuwatumia na kuwaamini wachezaji vijana. Ndani ya Yanga, mashabiki watarajie soka la burudani lenye nidhamu ya hali ya juu, huku wachezaji wenye vipaji vya kipekee kama Stephane Aziz Ki wakitarajiwa kupewa mifumo inayowapa uhuru wa kuonyesha makali yao zaidi.
2. Kurejesha Utawala wa Ndani (NBC Premier League)
Fadlu anaikuta Yanga ikiwa kwenye presha kubwa ya matokeo baada ya kuachana na Mngqithi. Kwa sasa, Simba SC chini ya kocha Steve Barker inashikilia usukani ikiwa mbele kwa alama tano dhidi ya Yanga. Kazi ya kwanza na ya haraka kwa Fadlu itakuwa kuziba pengo hilo la alama na kuhakikisha Yanga inatetea ubingwa wake wa Ligi Kuu.
Hatua yoyote ya kusuasua itamweka kwenye presha kubwa kutoka kwa 'Wananchi' ambao wamezoea ladha ya ushindi mfululizo.
3. Mtihani Mzito wa Kimataifa (CAF Champions League)
Moja ya mafanikio makubwa ya Fadlu Davids akiwa Tanzania ilikuwa ni kuifikisha Simba SC kwenye Fainali ya Kombe la Shirikisho Afrika (CAF Confederation Cup) msimu wa 2024/25 ambapo walipoteza dhidi ya RS Berkane. Uzoefu huo wa kimataifa ndio ulioishawishi Yanga kumng'ang'ania.
Hata hivyo, safari hii anakabiliwa na ngazi kubwa zaidi: Ligi ya Mabingwa Afrika (CAFCL). Yanga imepangwa kundi gumu lenye timu kama Zamalek (Misri), MC Alger (Algeria), na Club Africain (Tunisia). Mashabiki wanatarajia Fadlu atumie mbinu zake kuivusha Yanga hatua ya makundi na kwenda robo fainali au nusu fainali, mfupa uliowashinda makocha wengi waliopita Jangwani.
4. Presha na Kisasi cha Kariakoo Derby
Kuvuka kutoka upande mmoja wa Kariakoo kwenda mwingine ni tukio la kijasiri sana. Akiwa Simba, Fadlu hakufanikiwa kushinda mchezo wowote wa dabi dhidi ya Yanga wala kutwaa taji lolote.
Sasa anarudi akiwa upande wa pili. Mashabiki wa Simba watataka kumthibitishia kuwa walikuwa sahihi kuachana naye, huku yeye akitaka kutumia ubora wa kikosi cha Yanga kupata ushindi wake wa kwanza wa dabi nchini Tanzania.
Michezo kati ya Yanga ya Fadlu Davids na Simba ya Steve Barker itakuwa ya kukata na shoka.
Ujio wa Fadlu Davids ndani ya Yanga ni kama kisu chenye makali kuwili. Upande mmoja unaleta kocha mwenye weledi mkubwa, anayejua vizuri mazingira na presha ya soka la Tanzania, na mwenye kiu ya mafanikio.
Upande wa pili, anakutana na mashabiki wenye subira ndogo na viongozi wanaotaka matokeo ya haraka. Ataweza?
