Kocha wa viungo Adnan Behlulovic ameendelea kutoa ishara zinazozua maswali kupitia kurasa zake za mitandao ya kijamii, huku tetesi za kurejea kwake Jangwani zikiwa bado zinavuma.
Kwa takribani wiki moja sasa, jina la Adnan limekuwa likitajwa kuhitajika na Wananchi baada ya kusitishwa mkataba wa Chyna Mokayla aliyekuwa kocha wa viungo.
Kocha huyo amekuwa akitumia kurasa zake za mitandao ya kijamii kuweka picha za kumbukumbu za matukio mbalimbali aliyoyafanya akiwa na Yanga, jambo linalozidi kuchochea hisia za mashabiki kuhusu uwezekano wa kurejea kwake.
Kwa sasa, Yanga inatajwa kuwa katika mipango ya kumrejesha kocha Sead Ramovic, ambaye aliwahi kuinoa timu hiyo katika awamu ya kwanza. Ikumbukwe kuwa Adnan Behlulovic alikuwa sehemu ya benchi lake la ufundi wakati huo.
Endapo mpango wa kurejea kwa Ramovic utafanikiwa, uwezekano wa Adnan kurejea Jangwani kwa mara ya pili unaweza kuwa mkubwa zaidi. Hata hivyo, mpaka sasa hakuna uthibitisho rasmi kutoka kwa klabu kuhusu kurejea kwa kocha huyo.
HISTORIA YA ADNAN BEHLULOVIC NDANI YA YANGA
Adnan Behlulovic alijiunga rasmi na Yanga SC Novemba 15, 2024, akiletwa na aliyekuwa kocha mkuu wa timu hiyo, Sead Ramovic.
Akiwa ndani ya kikosi cha Wananchi, Adnan alihusika zaidi na maandalizi ya viungo na utimamu wa miili ya wachezaji. Pia alitajwa kuwa na mchango katika kuwasaidia wachezaji kurejea kwenye hali nzuri ya ushindani baada ya kukabiliwa na majeraha.
Hata hivyo, safari yake ndani ya Yanga haikuwa ndefu kwani aliondoka Februari 4, 2025, kufuatia kuondoka kwa Sead Ramovic.
BAADA YA KUONDOKA YANGA
Baada ya kuondoka Jangwani, Adnan amekuwa akihusishwa na uwezekano wa kujiunga na Azam FC. Aidha, ameendelea kujihusisha na shughuli za ukocha wa vijana, ikiwemo timu ya U19 ya FK Zeljeznicar Sarajevo.
YANGA BADO KIMYA KUHUSU KOCHA MPYA
Wakati huohuo, Yanga bado haijamtangaza rasmi kocha wake mkuu mpya, licha ya uongozi wa klabu hiyo kueleza kuwa kocha anayetarajiwa tayari yupo nchini na kwamba atatangazwa wakati wowote.
Hali hiyo imeendelea kuongeza hamasa na maswali miongoni mwa mashabiki wa Yanga, ambao wanasubiri kuona sura zitakazoongoza benchi la ufundi katika kipindi kijacho.
