Mamelodi Sundowns jana walikumbana na matokeo wasiyoyatarajia wakitupwa nje ya michuano ya ligi ya mabingwa (CAFC) baada ya kulazimishwa sare ya bao 1-1 dhidi ya Wiliete Sc ya Angola.
Wiliete wamefuzu kwa faida ya bao la ugenini baada ya suluhu ya bila kufungana (0-0) kwenye mchezo wa kwanza uliopigwa Angola.
Mashabiki wa Yanga wanaikumbuka Wiliete Sc, walikutana nayo msimu uliopita hatua ya awali na kuiondosha kwa ushindi wa jumla wa mabao 5-0 katika mechi zote mbili.
Lakini msimu huu Wiliete wamejipanga na kufanikiwa kumuondosha bingwa mtetezi wa michuano hiyo.
Matokeo hayo yanawakumbusha mashabiki wa soka kuwa ni lazima kumuheshimu mpinzani wako, timu ndogo huwa ziko kwenye makaratasi tu.
Kipigo hicho cha Sunddowns pia kimewapa tabasamu Wananchi kwani bado hawajasahau kile kilichotokea misimu miwili iliyopita mchezo wa robo fainali dhidi ya Sundowns.
Kama sio bao la Stephane Aziz Ki kukataliwa katika hali ya utata, pengine Yanga ingekuwa tayari imeandika historia ya kucheza nusu fainali ya CAFCL.
Sundowns walinusurika kupitia 'mbeleko ya refa' na wakafanikiwa kuiondosha Yanga kwenye mikwaju ya penati.
Ni wazi msimu huu ipo nafasi kubwa ya Yanga kufanya vyema zaidi kwenye michuano hiyo kwani kwenye makaratasi hakuna timu ya kuihofia baada ya baadhi ya vigogo kukosekana.
