Beki wa kulia wa Yanga SC, Israel Patrick Mwenda, ameagizwa kurejea katika majukumu yake ndani ya klabu hiyo na kuendelea kutekeleza masharti ya mkataba alionao.
Uamuzi huo umetolewa na Kamati ya Sheria ya Shirikisho la Soka Tanzania (TFF) baada ya kushughulikia shauri linalomhusu mchezaji huyo na klabu yake.
Kwa mujibu wa uamuzi huo, Mwenda anatakiwa kurejea kazini na kuendelea kuheshimu mkataba wake na Yanga SC, hatua inayoweka wazi wajibu wa mchezaji huyo kuendelea na majukumu yake ndani ya klabu.
Yanga yaendelea kusimamia mkataba
Kwa upande wa Yanga SC, klabu hiyo imeendelea kusimamia msimamo wake kwamba Mwenda anapaswa kuheshimu mkataba wake na kuendelea kutekeleza wajibu wake kama mchezaji wa klabu.
Mwenda amekuwa nje ya kikosi cha Yanga tangu mwishoni mwa msimu uliopita kwa kile kilichoelezwa kuwa aliomba kupumzika kujitathmini baada ya kutokuwa kwenye kiwango kizuri kwenye mchezo wa ligi kuu dhidi ya Simba ambao ulimalizika kwa matokeo ya sare ya mabao 2-2.
Mara kadhaa uongozi wa Yanga ulimtaka mchezaji huyo kuripoti na kueleza changamoto zilizokuwa zikimkabili bila ya mafanikio.
