Ambani 'awachana' Waarabu baada ya kutolewa mapema Urusi

Morocco na Misri tayari zimeiaga michuano ya kombe la dunia inayoendelea huko Urusi baada ya kupoteza michezo yao miwili mwanzo .

Misri ilichapwa na Uruguay/Urusi wakati Morocco ilichapwa na Irani/Ureno hivyo kuwa timu za kwanza kabisa kuyaaga mashindano hayo.

Boniface Ambani, mshambuliaji wa zamani wa Yanga aliyeisaidia timu hiyo kutwaa ubingwa wa ligi Kuu msimu wa 2008/09 yeye akiibuka mfungaji bora kwa kufunga mabao 18, hakushangazwa na timu hizo kutolewa mapema.

"Hawa watu acha wapigwe warudi Africa," ameandika Ambani kwenye ukurasa wake wa mtandao wa Instagram.

"Mwaka mmoja (2009) tulienda Misri kucheza mchezo wa ligi ya mabingwa. Tuliposhuka uwanja wa Ndege wakatukejeli kwa kutuuliza Afrika inaendeleaje?"

"Nikashangaa sana nakujiuliza kwani hapa tulipotua ni Ulaya au?"

"Vituko walivyotufanyia sasa! Wakatupeleka Hotel mbaya, tukagoma na kuwaambia tunataka hoteli ya nyota tano, ilichukua saa tano kutusikiliza."

"Vikafuata vituko vya uwanjani, wanapewa mabao hakuna! Mchezaji wao akiguswa eneo la hatari jua ni penati."

"Morocco, Tunisia na Misri ni vizuri tu watolewe warudi nyumbani mapema. Hawajui maana ya mchezo wa kiungwana."

"Mateso nliyopata mikononi mwa hawa watu ni Mungu pekee ndiye ajuae. Karibuni Afrika, nanyi mmeonjeshwa kile mnachotufanyia!"

Maneno ya Ambani yameungwa mkono na wadau wengi kwani sio siri Mataifa hayo yamekuwa na kawaidia ya kutengeneza mazingira magumu kwa timu wanazopambana nazo katika viwanja vyao vya nyumbani.

Tabia hiyo imekuwa ikiwasaidia kutawala soka la Afrika lakini wakitoka nje ya Afrika timu zao hufungwa kirahisi.