Kiungo wa zamani wa klabu ya Yanga, Mohamed Doumbia, amepata chimbo jipya la kazi akijiunga na klabu ya Hassania d’Agadir inayoshiriki Ligi Kuu ya nchini Morocco (Botola Pro).
Doumbia, raia wa Ivory Coast, alijiunga na miamba hiyo ya soka la Morocco kwa mkataba wa mkopo wa msimu mzima akitokea Yanga SC.
Hatua hii inakuja baada ya kiungo huyo kumaliza muda wake wa mkopo katika klabu ya Marumo Gallants ya Afrika Kusini, ambako alicheza kwa mafanikio makubwa msimu uliopita kabla ya kurejea kwa muda jijini Dar es Salaam kwa klabu yake ya Yanga.
Ripoti kutoka nchini Morocco zinaeleza kuwa Doumbia tayari amejumuishwa kwenye kikosi cha kwanza cha Hassania d’Agadir na ameanza vyema majukumu yake.
Katika michezo yake miwili ya kwanza tangu asajiliwe, kiungo huyo amefanikiwa kucheza kwa dakika zote 90, jambo linalothibitisha kuwa tayari ameshateka imani ya benchi la ufundi la timu hiyo.
Huu ni msimu wa mwisho wa mkataba wake wa miaka miwili na Yanga, Doumbia atakuwa mchezaji huru mara baada ya mkataba wake wa mkopo nchini Morocco kumalizika.
