Kikosi cha Yanga kimerejea mazoezini wachezaji wakiwa na ari kubwa kuelekea mchezo wa ligi kuu dhidi ya Simba utakaopigwa Oktoba 10.
Wakati wapinzani wao Simba wakianza tambo mapema, upande wa Yanga mambo ni tofauti kwani wameweka nguvu kubwa zaidi kwenye maandalizi kuliko kelele za mitandaoni.
Meneja wa Habari na Mawasiliano wa Yanga Ali Kamwe amesema wanajiandaa kikamilifu kuhakikisha kikosi kinakuwa tayari kwa mchezo huo dhamira yao ikiwa kuchukua alama zote tatu.
Kamwe amesema Yanga inakosa idadi kubwa ya wachezaji ambao wako kwenye majukumu ya timu za Taifa za wakubwa na vijana (wachezaji 15).
Licha ya kuwakosa wachezaji hao, amesema waliopo wanaendelea na program za mazoezi chini ya Kocha Mkuu Manqoba Mngqithi.
