Rais wa Klabu ya Yanga na Mwenyekiti wa Shirikisho la Vilabu Afrika (ACA), Eng. Hersi Ally Said, akiwa nchini Sweden amepata fursa ya kukutana na Balozi wa Tanzania nchini Sweden, Mhe. Swahiba Mndeme, katika Jiji la Stockholm.
Katika ziara hiyo, Eng. Hersi alifanya mazungumzo na Mhe. Balozi Mndeme kuhusu masuala mbalimbali yanayohusu maendeleo ya michezo, hususan nafasi ya Watanzania wanaoishi nje ya nchi katika kuendeleza na kuitangaza michezo ya Tanzania katika mataifa mbalimbali.
Aidha, Rais huyo wa Klabu alipata nafasi ya kukutana na Viongozi wa Kilimanjaro FF, timu inayomilikiwa na kuendeshwa na Watanzania wanaoishi nchini Sweden.
Kilimanjaro FF imekuwa sehemu ya jitihada za Watanzania waishio Sweden kuendeleza vipaji na kujenga daraja la michezo kati ya Tanzania na diaspora.
Mkutano huo ulitoa fursa kwa viongozi hao kubadilishana uzoefu na mawazo kuhusu maendeleo ya soka, ushirikiano wa kimichezo pamoja na namna ya kuendelea kuwaunganisha Watanzania kupitia michezo.
