Rais wa Shirikisho la Soka Afrika (CAF), Dk. Patrice Motsepe, amempongeza Mwenyekiti wa African Club Association (ACA), Injinia Hersi Ally Said, kwa kazi anayofanya katika kuendeleza maslahi ya klabu za soka barani Afrika.
Motsepe alitoa pongezi hizo jana Alhamisi, Septemba 17, 2026, jijini Dar es Salaam, wakati wa ziara yake ya kukagua maendeleo ya maandalizi ya Fainali za Mataifa ya Afrika (AFCON) 2027, zitakazofanyika kwa pamoja Tanzania, Kenya na Uganda.
Katika hotuba yake, Motsepe alimtaja Hersi miongoni mwa viongozi wa soka anaowafuatilia kwa karibu na kueleza fahari yake kutokana na namna wanavyotekeleza majukumu yao katika kuendeleza mchezo huo.
“Ninamuona Mwenyekiti wetu wa Chama cha Klabu za Afrika, kazi nzuri unayofanya, ninajivunia. Pia kazi ambayo Wallace (Karia) anafanya kwa ajili ya mpira wa miguu, ninajivunia sana,” alisema
Motsepe pia alieleza matumaini yake kwamba klabu za Tanzania zitaendelea kufanya vizuri katika mashindano ya kimataifa, akizitaja Yanga na Simba kuwa miongoni mwa timu zinazoweza kuendelea kulitangaza jina la Tanzania katika soka la Afrika.
Hersi na nafasi yake katika soka la Afrika
Hersi Said alichaguliwa kuwa Mwenyekiti wa kwanza wa African Club Association mwaka 2023, wakati wa uzinduzi wa taasisi hiyo mjini Cairo, Misri. ACA imeanzishwa kama jukwaa la kuwakilisha na kutetea maslahi ya klabu za soka barani Afrika.
Majukumu ya ACA yanahusisha kushirikiana na viongozi wa klabu kutoka maeneo mbalimbali ya Afrika katika masuala ya sera, fursa za kibiashara, utawala bora na kuimarisha uwezo wa klabu kushindana katika kiwango cha kimataifa.
