Kocha Mkuu wa Yanga Manqoba Mngqithi amefunguka kuhusu maandalizi ya kikosi cha Yanga kuelekea mchezo wa kesho dhidi ya Geita Gold, akisisitiza kuwa wanatarajia kukutana na mpinzani mwenye ubora mkubwa na ambao wana uwezo wa kuleta changamoto.
Manqoba amesema Geita Gold ni timu yenye wachezaji wenye uwezo mkubwa kiufundi, ikiwa na mpangilio mzuri wa mchezo, ulinzi imara pamoja na uwezo wa kufanya mashambulizi ya kushtukiza.
“Tunakwenda kukutana na timu nzuri sana. Ina wachezaji wenye uwezo mkubwa kiufundi, ni timu yenye mpangilio mzuri, iliyoshikamana kwenye ulinzi na yenye uwezo mkubwa wa kufanya mashambulizi ya kushtukiza. Ni timu ambayo inaweza kushangaza na kuifunga timu yoyote, hivyo tunafahamu hatuchezi dhidi ya wapinzani wepesi,” amesema Manqoba.
Mabadiliko kwenye kikosi
Kocha huyo amesema bado hawezi kuweka wazi mabadiliko yatakayofanyika kwenye kikosi kuelekea mchezo huo, kwa kuwa timu haijafanya mazoezi kamili na bado wanaendelea kutathmini hali ya baadhi ya wachezaji.
Amesema majeraha madogo yaliyowapata baadhi ya wachezaji katika mchezo uliopita yanaweza kuathiri uchaguzi wa kikosi.
“Kwa hatua hii ni vigumu kusema kama kutakuwa na mabadiliko gani kwenye timu kuelekea mchezo wetu wa kesho. Bado hatujafanya mazoezi kamili na hatujajua kwa uhakika hali ya majeruhi na wachezaji waliopata majeraha madogo kwenye mchezo uliopita. Hata hivyo, ni wazi kutakuwa na baadhi ya mabadiliko.”
Manqoba: Sina presha
Manqoba pia amesema hana presha kuelekea mchezo huo, akieleza kuwa yupo katika nafasi ambayo alitamani kuwa na kwamba anafurahia ushindani wa ligi.
Kocha huyo amesisitiza umuhimu wa timu kuchukua mchezo mmoja baada ya mwingine, hasa kutokana na ushindani mkubwa uliopo kwenye ligi.
“Sina presha, niko kwenye nafasi ambayo nilitamani kuwa. Tunapaswa kufurahia ushindani na kuona mapambano yataishia wapi. Hii ni ligi yenye ushindani mkubwa na bado hatujacheza dhidi ya baadhi ya timu kubwa, hivyo tunapaswa kuchukua mchezo mmoja baada ya mwingine.”
Mapumziko ya FIFA yatatoa nafasi ya kuboresha timu
Kwa upande mwingine, Manqoba amekiri kuwa bado kuna maeneo mengi ambayo timu inahitaji kuyaboresha. Hata hivyo, amesema muda mdogo wa maandalizi na mazoezi umekuwa changamoto katika kufanya maboresho makubwa.
Ametoa matumaini kuwa mapumziko ya FIFA yatatoa nafasi kwa timu kufanya kazi zaidi, ikiwa ni pamoja na kuboresha utimamu wa baadhi ya wachezaji.
“Bado kuna mambo mengi tunapaswa kuyaboresha. Tatizo ni kwamba tunapokosa muda wa kutosha wa mazoezi, inakuwa vigumu kufanya maboresho makubwa. Tunatumaini mapumziko ya FIFA yatatusaidia kwa kiasi fulani, ikiwemo kuboresha viwango vya utimamu wa baadhi ya wachezaji.”
Atoa wito kwa Wananchi
Manqoba pia amewapongeza mashabiki wa timu hiyo, akiwashukuru kwa namna walivyoendelea kuwa pamoja na timu katika kipindi cha ratiba yenye changamoto.
Ameomba mashabiki hao kuendelea kutoa sapoti na kujitokeza kwa wingi katika mchezo wa kesho ili kuwaongezea nguvu wachezaji uwanjani.
“Napenda kuwashukuru na kuwapongeza Wananchi. Wamekuwa pamoja na timu, wametupa sapoti kubwa katika ratiba yetu ngumu na wameendelea kutuunga mkono kila siku. Naomba waendelee na utamaduni huo wa kutuunga mkono, nasi tutaendelea kuboresha kiwango chetu.”
Akaongeza:
“Tunawahitaji kesho waje kwa wingi na watupatie nguvu kama mchezaji wetu wa 12, ili kwa pamoja tuhakikishe tunapata ushindi.”
