Kocha Mkuu wa Yanga, Manqoba Mngqithi, ameanza majukumu yake ndani ya klabu hiyo kwa kishindo, huku matokeo ya awali yakionyesha wazi kuwa Rais wa Yanga, Injinia Hersi Said, hakukosea kumfuata kocha huyo kutoka Afrika Kusini.
Baada ya kukamilika kwa raundi ya tano ya Ligi Kuu ya NBC, Manqoba amedhihirisha mapema uwezo wa kuiongoza Yanga katika msimu ambao mabingwa hao wa Tanzania wanalenga kutetea mataji yao ya ndani.
Katika mechi sita za mashindano ya ndani ambazo ameiongoza Yanga, Manqoba ameshinda zote sita. Katika michezo hiyo, Yanga imefunga jumla ya mabao 16, huku ikiruhusu mabao mawili pekee.
Ligi Kuu: Yanga haijapoteza hata pointi moja
Katika Ligi Kuu ya NBC, Yanga imeendelea kuonyesha ubabe wake ikiwa kileleni mwa msimamo baada ya kushinda michezo yote mitano iliyocheza.
Timu hiyo imefunga mabao 15 katika mechi hizo, huku ikiruhusu mabao mawili tu. Takwimu hizo zinaonyesha siyo tu uwezo wa Yanga kufunga, bali pia uimara wa safu yake ya ulinzi chini ya Manqoba.
Kumbukumbu nyingine muhimu ni ushindi wa bao 1-0 dhidi ya Simba katika Ngao ya Jamii, mchezo uliompa Manqoba taji lake la kwanza akiwa na Yanga na kuanza safari yake kwa ushindi dhidi ya watani wa jadi.
Sasa macho yote ni Afrika
Baada ya kuanza kwa kasi kwenye mashindano ya ndani, jukumu kubwa linalomsubiri Manqoba ni kuhakikisha Yanga inafikia hatua ya makundi ya Ligi ya Mabingwa Afrika.
Yanga itaanza safari hiyo Jumamosi hii nchini Botswana, ambako itakutana na Gaborone United katika mchezo wa kwanza wa hatua ya awali ya michuano hiyo.
Mchezo huo ni muhimu kwa Yanga kwani ushindi utaiweka timu hiyo katika mazingira mazuri kabla ya mchezo wa marudiano utakaopigwa wiki moja baadaye jijini Dar es Salaam.
Kwa kuangalia mwanzo wake, Manqoba tayari ameanza kutoa majibu ndani ya uwanja. Mechi sita, ushindi sita, mabao 16 ya kufunga na mawili pekee ya kufungwa, takwimu zinazompa kila shabiki wa Yanga sababu ya kuamini kuwa huenda safari ya kocha huyo ikawa na mafanikio makubwa.
