Mashabiki wa Yanga SC wanaweza kuanza kuhesabu siku za kumuona tena mshambuliaji Clement Mzize akirejea uwanjani baada ya kukosekana kwa muda mrefu kutokana na jeraha la goti.
Mzize amekuwa nje ya uwanja kwa karibu msimu mzima akiuguza jeraha hilo. Hata hivyo, kwa sasa nyota huyo amepona na ameanza kufanya mazoezi pamoja na timu, hatua inayotoa matumaini makubwa ya kurejea kwake katika kikosi.
Mzize na beki Dickson Job ndio wachezaji pekee wa Yanga ambao wamekuwa nje ya uwanja tangu kuanza kwa msimu huu kutokana na majeraha.
Meneja wa Habari na Mawasiliano wa Yanga, Ali Kamwe, amesema Mzize ameendelea kuimarika na huenda akarejea uwanjani mapema zaidi ya ilivyotarajiwa.
Kwa mujibu wa Kamwe, taarifa ya awali ilionyesha kuwa Mzize na Job walitarajiwa kurejea uwanjani mwanzoni mwa Oktoba. Hata hivyo, maendeleo mazuri wanayoendelea kuyaonyesha katika uwanja wa mazooezi yanaweza kufanya kurejea kwao kuwa mapema.
Mzize, ambaye amekuwa mmoja wa wachezaji wanaoaminika katika kikosi cha Yanga, anatarajiwa kuongeza nguvu katika safu ya ushambuliaji mara atakapokuwa tayari kurejea kwenye ushindani wa mechi rasmi.
