Stephane Aziz Ki amerejea Yanga SC, na safari hii kurejea kwake Jangwani si jambo la kawaida. Ni usajili unaobeba kumbukumbu, matarajio na ujumbe mzito wa kile ambacho mabingwa wa Tanzania Bara wanataka kukifanya msimu huu.
Kiungo huyo mshambuliaji amerejea Yanga akitokea Al Ittihad ya Libya, akichukua nafasi iliyoachwa na Allan Okello ambaye klabu hiyo imemuuza kwenda AS FAR ya Morocco. Kwa Yanga, huu si uhamisho wa kuziba nafasi tu; ni kurejesha mchezaji ambaye tayari alishawahi kuthibitisha thamani yake katika mazingira yale yale anayorejea kuyakabili.
Aziz Ki aliondoka Yanga misimu miwili iliyopita baada ya kuwa sehemu muhimu ya kikosi kilichokuwa kikitawala soka la ndani. Katika kipindi chake cha kwanza Jangwani, aliifungia Yanga mabao 52 katika mashindano yote huku akitoa asist 34.
Msimu wa 2023/24 ulikuwa kilele cha ubora wake. Alitwaa tuzo ya mfungaji bora wa NBC Premier League, MVP wa msimu pamoja na tuzo ya kiungo bora. Huo ndio urithi anaorudi nao Jangwani.
Sasa swali si kama Aziz Ki ana uwezo wa kuichezea Yanga.
Swali ni: Aziz Ki wa sasa anaweza kuifanya Yanga iwe bora kwa kiwango gani?
Kurudi kwa mfalme aliyekuwa anajulikana
Kuna tofauti kubwa kati ya kumsajili mchezaji mpya na kumrudisha mchezaji ambaye tayari anajua DNA ya klabu.
Aziz Ki anajua presha ya Yanga. Anajua matarajio ya mashabiki. Anajua ukubwa wa mechi za Kariakoo. Anajua maana ya kucheza ligi ambayo kila mchezo kwa Yanga unachukuliwa kama hatua nyingine kuelekea ubingwa.
Zaidi ya yote, anajua mfumo na mazingira ya klabu.
Hilo linaweza kuwa faida kubwa kwake katika kipindi ambacho wachezaji wapya mara nyingi huhitaji muda wa kuzoea.
Lakini kurejea kwake pia kunakuja na changamoto moja kubwa: matarajio yatakuwa makubwa kuliko mara ya kwanza.
Mashabiki tayari wanajua Aziz Ki anaweza kufanya nini. Wamemwona akifunga, akitengeneza mabao na kubeba timu katika nyakati muhimu. Kwa hiyo, kiwango cha kawaida hakitatosha. Atatarajiwa kuwa yule Aziz Ki aliyewahi kutawala ligi.
Nini kipya Aziz Ki analeta Yanga?
Kwanza, analeta ubunifu katika eneo la mwisho la uwanja.
Aziz Ki ni aina ya kiungo ambaye anaweza kucheza kati ya mistari, kupokea mpira katika maeneo hatari, kutengeneza nafasi na pia kumalizia mwenyewe.
Hii ni muhimu kwa Yanga kwa sababu timu kubwa mara nyingi hukutana na wapinzani wanaokaa nyuma na kujilinda kwa idadi kubwa ya wachezaji.
Katika mazingira hayo, nguvu pekee hazitoshi.
Unahitaji mchezaji anayoweza kufungua mlango kwa pasi moja, dribbling moja, movement moja au mpira wa mwisho.
Aziz Ki ana uwezo huo.
Pili, anarejesha tishio la mabao kutoka eneo la kiungo.
Hili ni jambo muhimu sana. Mshambuliaji anapokuwa na uhakika kwamba kuna kiungo nyuma yake mwenye uwezo wa kufunga, safu ya ulinzi ya mpinzani inalazimika kugawanya umakini.
Hapo ndipo nafasi zinaanza kutokea.
Na msimu huu Yanga ina mshambuliaji ambaye anaweza kutumia nafasi hizo vizuri.
Aziz Ki na Peter Shalulile: Mchanganyiko unaoweza kutisha
Moja ya mambo yanayofanya kurejea kwa Aziz Ki kuwa na mvuto mkubwa ni aina ya kikosi anachokutana nacho.
Miongoni mwa silaha mpya za Yanga ni Peter Shalulile, mshambuliaji aliyesajiliwa kutoka Mamelodi Sundowns.
Shalulile si jina dogo. Akiwa Afrika Kusini, alijenga historia kubwa na kufikia mabao 132 katika Ligi Kuu ya nchi hiyo, rekodi iliyomfanya kuwa mfungaji bora wa muda wote wa ligi hiyo.
Na tayari ameanza kuonyesha uwezo wake Yanga baada ya kufunga katika mchezo wake wa kwanza wa ligi dhidi ya Namungo FC.
Sasa fikiria mchanganyiko wa aina hizi mbili za wachezaji.
Shalulile ni mshambuliaji anayependa kutafuta nafasi, kukimbia nyuma ya mabeki na kuwa kwenye eneo sahihi kwa wakati sahihi.
Aziz Ki anaweza kuwa mchezaji anayemtafuta. Hapo ndipo Yanga inaweza kupata silaha kubwa. Aziz Ki akipata mpira kati ya mistari, Shalulile akianza kukimbia nyuma ya mabeki, ulinzi unalazimika kufanya uamuzi. Ukifuatilia Aziz Ki, unampa Shalulile nafasi.
Ukifuatilia Shalulile, unampa Aziz Ki muda na nafasi ya kupiga pasi au kuingia kwenye box.
Huo ni mtego wa kiufundi ambao unaweza kuifanya Yanga iwe hatari zaidi.
Na Suleiman Mwalimu je?
Yanga pia imeongeza nguvu kwa kumsajili Suleiman Mwalimu kutoka Wydad AC.
Mwalimu aliitumikia Simba msimu uliopita na kufunga mabao tisa katika ligi, akiwa kinara wa ufungaji wa timu hiyo katika mashindano hayo.
Hii ina maana kwamba Aziz Ki hatakuwa na jukumu la kutengeneza nafasi kwa mchezaji mmoja pekee.
Atakuwa na chaguo nyingi zaidi mbele yake.
Hilo linaweza kumfanya Aziz Ki awe hatari zaidi kwa sababu wapinzani watashindwa kumuwekea ulinzi wa mtu mmoja pekee.
Yanga yenye sura mpya mbele
Mbali na Shalulile na Mwalimu, Yanga inaendelea kujenga safu ya ushambuliaji yenye ushindani mkubwa.
Kuna Cheick Ibrahim Touré, mshambuliaji aliyesajiliwa kutoka Saudi Arabia, pamoja na Albert Kangwanda, ambaye aliingia Yanga akiwa na heshima ya MVP wa Ligi Kuu ya Zambia msimu uliopita.
Kwa hiyo, changamoto kubwa kwa benchi la ufundi haitakuwa kupata wachezaji wa kufunga pekee. Itakuwa ni jinsi ya kuunganisha vipaji hivi ili viwe timu moja. Hapo ndipo Aziz Ki anaweza kuwa sehemu muhimu ya suluhisho. Mchezaji kama yeye anaweza kuwa daraja kati ya kiungo na safu ya ushambuliaji.
Na wale aliowakuta bado wapo
Kurejea kwa Aziz Ki pia kunakuwa rahisi kwa sababu baadhi ya wachezaji aliocheza nao awali bado wapo.
Maxi Nzengeli, Duke Abuya, Mudathir Yahya, Bacca, Job, Mwamnyeto, Yao Kouassi na Djigui Diarra ni miongoni mwa sura ambazo si ngeni kwake.
Hii inaweza kusaidia kujenga muunganiko wa haraka. Aziz Ki hatalazimika kuanza kila kitu kutoka sifuri. Anarudi kwenye mazingira ambayo baadhi ya watu anaowakuta tayari wanaelewa namna anavyocheza.
Lakini je, anaweza kuziba pengo la Allan Okello?
Hili ni swali muhimu.
Okello alikuwa na uwezo mkubwa wa ubunifu na alikuwa sehemu ya mfumo ambao Yanga ilitegemea katika kutengeneza nafasi.
Aziz Ki hawezi kutarajiwa kuwa nakala ya Okello.
Badala yake, Yanga imechagua kurudisha mchezaji mwenye wasifu tofauti lakini mwenye uwezo wa kutoa mchango mkubwa katika eneo hilo hilo.
Tofauti kubwa inaweza kuwa kwenye uzoefu wa ligi ya Tanzania na uwezo wa Aziz Ki kufunga.
Wakati Okello alihitaji kujenga historia yake ndani ya Yanga, Aziz Ki anarudi akiwa tayari ameshajua nini kinahitajika ili afanye vizuri Jangwani.
Hilo linaweza kupunguza muda wa mpito.
Changamoto kubwa ipo hapa
Pamoja na matarajio yote, Aziz Ki hatakiwi kubeba Yanga peke yake.
Kumtegemea mchezaji mmoja kuwa chanzo cha ubunifu, mabao na ushindi katika msimu mzima kunaweza kuwa kosa.
Yanga inahitaji mfumo ambao unampa Aziz Ki mazingira ya kufanya kazi yake.
Ikiwa wapinzani watamkaba kwa karibu, lazima kuwe na wachezaji wengine wanaoweza kuadhibu nafasi zitakazofunguka.
Ikiwa atachezeshwa mbali sana na lango, Yanga inaweza kupoteza ubora wake wa mwisho.
Ikiwa atapewa uhuru mkubwa bila uwiano wa kiungo, timu inaweza kuwa wazi wakati wa kupoteza mpira.
Kwa hiyo, thamani halisi ya Aziz Ki itategemea si uwezo wake binafsi pekee, bali namna benchi la ufundi chini ya kocha Manqoba Mngqithi litakavyomtumia.
Matarajio ya Wananchi
Matarajio ya mashabiki wa Yanga ni makubwa.
Baada ya kuendelea kutawala soka la ndani, msimu huu wanataka kuona ubabe huo ukiendelea. Lakini zaidi ya hapo, macho yako kwenye Ligi ya Mabingwa Afrika.
Hapo ndipo kipimo halisi cha kikosi hiki kitakapokuwa.
Katika soka la Afrika, ubora wa mchezaji mmoja unaweza kuamua mchezo mmoja, lakini ubora wa timu ndio unaoweza kukupeleka hatua za juu.
Aziz Ki ana uzoefu wa mashindano makubwa na tayari anajua presha ya Yanga. Hivyo, kurejea kwake kunaweza kuwa na thamani kubwa katika mechi ambazo nafasi ni chache na tofauti kati ya kushinda na kutolewa inaweza kuwa mpira mmoja wa mwisho.
