Meneja wa Habari na Mawasiliano wa Yanga Ali Kamwe amethibitisha kuwa wamepokea ofa nono kutoka kwa klabu ya Petro Atletico ya Angola inayomuhitaji mshambuliaji Laurindo Aurelio 'Depu'.
Kamwe amesema wanasubiri mapendekezo ya benchi la ufundi kabla ya uongozi kuchukua hatua ya 'kufanya biashara'.
"Ni kweli klabu imepokea ofa nono kutoka Petro Atletico ambao wanamtaka mshambuliaji wetu Depu. Sasa tumewaachia benchi la ufundi kutoa mapendekezo yao kama watamuhitaji mshambuliaji huyo au tumejitosheleza eneo la safu ya ushambuliaji."
"Kama benchi la ufundi limeridhika na wachezaji wengine waliopo eneo la safu ya ushambuliaji, basi tunaweza kufanya biashara lakini mpaka sasa bado tuko kwenye mazungumzo," alisema Kamwe.
Inaelezwa Petro Atletico tayari wana makubaliano binafsi na Depu wakisubiri kukamilika mazungumzo yao na Yanga ili kukamilisha usajii huo.
Yanga inalazimika kupunguza mchezaji mmoja wa kigeni ili kusalia na wachezaji 12. Usajili wa washambuliaji wawili Cheick Ibrahima Toure na Peter Shalulile ni wazi utachangia uamuzi wa Yanga kumuuza Depu.
