Klabu ya Yanga imewasilisha makadirio ya bajeti ya msimu wa mashindano wa 2026/2027 yenye thamani ya Sh36.013 bilioni, ikiwa ni moja ya bajeti kubwa zaidi katika historia ya klabu hiyo.
Bajeti hiyo imewasilishwa leo na Mkurugenzi wa Fedha wa Yanga, Justina Ernest, wakati wa Mkutano Mkuu wa Uchaguzi unaoendelea katika ukumbi wa The Super Dome.
Kwa mujibu wa makadirio hayo, sehemu kubwa ya matumizi itaelekezwa katika kuboresha kikosi na kuimarisha uendeshaji wa klabu. Kiasi cha Sh13.1 bilioni kimetengwa kwa ajili ya mishahara na marupurupu ya watumishi, huku Sh8.7 bilioni zikielekezwa kwenye usajili wa wachezaji wapya kwa lengo la kuijenga timu yenye ushindani mkubwa katika mashindano ya ndani na kimataifa.
Aidha, bajeti hiyo pia imezingatia gharama za maandalizi ya mechi, kambi za timu, usafiri na shughuli nyingine muhimu za uendeshaji wa msimu mpya.
Kwa upande wa mapato, Yanga inatarajia kukusanya jumla ya Sh20.69 bilioni kupitia vyanzo mbalimbali vya mapato, huku ikilenga kuendelea kuimarisha uwezo wake wa kifedha na ushindani.
Kwa msimu wa 2025/2026, klabu ilikusanya jumla ya TSh 29.36 bilioni. Matumizi ya klabu yalifikia TSh 29.34 bilioni, ambapo sehemu kubwa ilielekezwa kwenye mishahara na marupurupu ya watumishi, usajili na uhamisho wa wachezaji, maandalizi ya mechi, usafiri, chakula na malazi.
Baada ya matumizi hayo, klabu ilibaki na bakaa ya TSh 17.5 milioni.
