Mabosi wa Yanga wanaendelea na maboresho ya kikosi kwa usiri mkubwa jana wakimtangaza Manqoba Mngqithi, kuwa kocha mkuu akichukua mikoba iliyoachwa na Pedro Goncalves ambaye nae juzi amejiunga na AS FAR ya Morocco.
Taarifa kutoka ndani ya uongozi wa Yanga imedokeza kuwa maboresho yanaendelea ambapo klabu hiyo iko kwenye hatua za mwisho kukamilisha usajili wa walinzi wawili kutoka klabu ya Mashujaa Fc.
Ndio! Yanga imetua mkoani Kigoma kuibomoa Mashujaa Fc wakikamilisha michakato ya usajili wa beki wa kati Mohamed Mussa na mlinzi wa kulia Abdulnasir Gamal.
Gamal anatua kuchukua nafasi ya Israel Mwenda ambaye mkataba wake na Wananchi umemalizika wakati usajili wa Mohamed Mussa ni sehemu ya mkakati wa kuboresha eneo la mabeki wa kati.
Msimu ujao ukuta wa Yanga hasa mabeki wa kati wote watakuwa wachezaji wa ndani. Mussa na Nasri Kombo wakiongezwa kuungana na Ibrahim Bacca, Dickson Job na Bakari Mwamnyeto.
Juzi wakati kalenda ya msimu mpya inatangazwa, Rais wa TFF Wallace Karia alitoa tahadhari kwa klabu kusajili wachezaji wengi ili kuwa na vikosi vipana kukabiliana na ratiba ya msimu ujao.
Ligi Kuu 2026/27 inapaswa kumalizika Mwezi Mei hivyo ni wazi kutakuwa na vipindi vya kucheza mechi 'bandika bandua'.
