Kocha wa zamani wa Yanga SC, Pedro Gonçalves, ameipongeza klabu hiyo kufuatia mafanikio ya kutwaa ubingwa wa Ligi Kuu ya NBC kwa msimu wa tano mfululizo, mafanikio yanayoendelea kuonyesha ubabe wa Wananchi katika soka la Tanzania.
Pedro, ambaye alihusika kwa sehemu kubwa katika safari ya ubingwa kabla ya kuondoka klabuni hapo mwezi Mei na nafasi yake kuchukuliwa na Abdihamid Moalin, amesema aliona dalili za ubingwa mapema baada ya Yanga kupata sare ya mabao 2-2 dhidi ya Simba SC.
Kwa mujibu wake, matokeo hayo ya dabi yalikuwa ishara muhimu kwamba Yanga ilikuwa tayari imefungua njia ya kutetea ubingwa wao.
Akiandika kwa hisia, Pedro alisema:
“Tulipopata sare ngumu ugenini kwenye uwanja wa wapinzani wetu wakuu tarehe 3 Mei, tukifanya comeback ya kuvutia katika mchezo huo tukiwa tayari tunaongoza kwa pointi tano pamoja na faida ya matokeo ya head-to-head, sote tulijua kwamba ingawa bado kulikuwa na safari ya kumaliza msimu, jambo moja lilikuwa la uhakika… Yanga Bingwa!!!”
Goncalves aliongeza kuwa baada ya matokeo hayo, aliamini kabisa kuwa kilichobaki kilikuwa ni kumaliza msimu kwa nidhamu, umakini na uthabiti, jambo ambalo Yanga imefanikiwa kulitekeleza hadi kutwaa ubingwa.
Pia aliwapongeza Wananchi kwa mshikamano wao mkubwa pamoja na benchi la ufundi lililoendelea kuisimamia timu hadi kufanikisha malengo ya msimu.
“Hongereni Wananchi!!” alihitimisha ujumbe wake.
Goncalves aliingoza Yanga kutwaa taji la Mapinduzi mapema mwaka huu na hivyo kufanya Wananchi wamalize msimu na mataji matatu wakiwa pia ni mabingwa wa Ngao ya Jamii.
