Mlinda lango wa Yanga Aboutwalib Mshery amewaalika mashabiki uwanja wa KMC Complex kuwaunga mkono kwenye mchezo wa ligi kuu dhidi ya TRA United ambao utapigwa kesho Jumamosi Juni 27.
Ukiwa ni mchezo wa raundi ya 29, ushindi utaiweka Yanga karibu na ubingwa wa tano mfululizo kwani kama watashinda kesho huenda wakahitaji angalau alama moja tu kwenye mchezo wa kuhitimisha msimu dhidi ya JKT Tanzania utakaopigwa Jumanne ijayo.
Mshery amesema wanatambua mchezo huo utakuwa mgumu lakini ameahidi watakwenda kupambana kusaka ushindi huku akitaja sapoti ya mashabiki wao kama silaha muhimu.
“Mchezo wa kesho ni mgumu sana. Hakuna urahisi wowote katika mchezo huu. Tunahitaji alama tatu muhimu kujiweka sawa kwa mchezo wa mwisho wa ligi."
"Tunahitaji sana hamasa ya mashabiki wetu kuanzia mchezo wa kesho na mchezo wa mwisho. Hamasa yao itatupatia nguvu kubwa kupata matokeo mazuri,” alisema Mshery.
Yanga itashuka kwenye mchezo huo ikiwa na kumbukumbu ya kulazimishwa suluhu ya bila kufungana kwenye mchezo wa mwisho walipokutana uwanja wa Sheikh Amri Abeid mkoani Arusha.
Hata hivyo wakati huu Yanga itashuka uwanjani ikiwa na kikosi chake kamili, matarajio ya Wananchi yakiwa kuondoka na alama zote tatu.
