Inaelezwa klabu ya Yanga haina mpango wa kuendelea na winga Buba Jammeh na ataondoka mwishoni mwa msimu.
Yanga ilimsajili Buba akitokea Angola kwenye dirisha dogo kwa mapendekezo ya kocha Pedro Goncalves hata hivyo nyota huyo raia wa Gambia ameshindwa kuthibitisha makali yake.
Kabla ya kujiunga na Yanga, Buba aliitumikia Interclube katika mechi saba zote zikiwa za Ligi Kuu Angola na kufunga bao moja, akiwa ni miongoni mwa nyota waliotabiriwa makubwa ingawa mambo yamekuwa tofauti.
Taarifa zaidi zimebainisha kuwa nyota huyo huenda akarejea Angola akitajwa kujiunga na klabu ya C.D. Primeiro de Agosto.
Yanga imejipanga kufanya maboresho makubwa ya kikosi pale dirisha la usajili litakapofunguliwa mwezi ujao ili kurejesha makali yao.
Msimu huu umekuwa mgumu kwa Yanga kutokana na changamoto walizokutana nazo kwenye usajili ambapo nyota wengi wapya waliosajiliwa msimu uliopita wameshindwa kuleta ushindani na kukosa nafasi kwenye kikosi cha kwanza.
Yanga inalazimika kutumia wachezaji wake walewale walioipa mafanikio katika misimu miwili au nyuma na kupelekea changamoto ya kikosi kuwa finyu.
Hali hiyo wakati mwingine imepelekea fatiki kwa wachezaji na kuonekana baadhi ya mechi wakitumia uzoefu kupata ushindi.
