Kombe la Dunia 2026 linaendelea kutimua vumbi katika nchi za Canada, Mexico na Marekani; leo DR Congo ikitarajiwa kuchuana na Ureno katika moja ya mechi za kundi K utakaopigwa saa 2 usiku
DR Congo inarejea kwenye fainali za Kombe la Dunia kwa mara ya kwanza tangu mwaka 1974, jambo linaloifanya mechi dhidi ya Ureno kuwa ya kihistoria kwa taifa hilo la Afrika.
Ureno inaingia kwenye mchezo huo ikiwa miongoni mwa timu zinazopewa nafasi kubwa ya kufanya vizuri kutokana na kikosi chake chenye nyota wengi na uzoefu mkubwa wa mashindano makubwa.
Mshambuliaji wa zamani wa Yanga Fiston Mayele ni miongoni mwa wachezaji wa kikosi cha DR Congo ambacho leo kitakuwa kikisaka ushindi mbele ya Ureno ambayo safu yake ya ushambuliaji inaongozwa na mkongwe Cristiano Ronaldo (41).
Bila shaka huu utakuwa mchezo wa kihistoria kwa Congo na hata Mayele ambaye anakwenda kutimiza ndoto yake ya kushiriki michuano ya kombe la Dunia.
