Kikosi cha Yanga kiko mkoani Arusha ambapo leo watakamilisha maandalizi yao kuelekea mchezo dhidi ya Fountain Gate ambao utapigwa kesho Alhamisi katika uwanja wa Sheikh Amri Abeid.
Wananchi wako kwenye msako wa ubingwa wa tano mfululizo, ushindani ukiwa mkali katika mechi hizi za lala salama.
Hivyo katika mchezo huo, alama tatu kwa Wananchi zitawafanya wakaribie kukamilisha malengo ingawa bado kutakuwa na mechi tatu ngumu za kuhitimisha.
Meneja wa Habari na Mawasiliano wa Yanga Ali Kamwe amewataka mashabiki na wanachama wa timu hiyo mkoani Arusha kujitokeza kwa wingi dimba la Sheikh Amri Abeid kuiongezea hamasa timu yao.
Kamwe amesema katika mechi hizi za mwishoni jukumu la mapambano ya alama tatu sio la wachezaji pekee, kila mwanayanga anapaswa kushiriki kwa mashabiki kwenda kwa wingi uwanjani kuipa sapoti timu yao.
Fountain Gate imebadilika tangu ujio wa kocha Freddy Felix Minziro licha ya kupoteza mchezo uliopita dhidi ya Azam Fc katika dimba la Sheikh Amri Abeid.
Hata hivyo licha ya ugumu wa mchezo huo, Yanga haitakuwa na mpango mwingine wa matokeo zaidi ya ushindi..
