Nahodha wa Yanga, Bakari Mwamnyeto amewataka mashabiki na wanachama wa timu hiyo kuhakikisha wanaunga mkono timu yao kwenye kila hatua katika mechi zilizobaki ili kuhakikisha wanamaliza msimu kwa nguvu na kutetea taji lao la ligi kuu kwa msimu wa tano mfululizo.
Juzi Mwamnyeto aliiongoza Yanga kupata ushindi muhimu wa mabao 2-0 dhidi ya Mashujaa Fc katika mchezo uliopigwa uwanja wa Lake Tanganyika mkoani Kigoma.
Baada ya mchezo huo, Yanga imebakiwa na mechi nne ambazo kama watashinda zote au kushinda tatu na kutoa sare moja, watajihakikishia ubingwa kwa msimu wa tano mfululizo
“Natambua mechi nne zilizosalia siyo nyepesi, lakini kadri tunavyoshinda kama tulivyoshinda dhidi ya Mashujaa ndivyo tunavyozidi kusogea karibu na malengo yetu, jambo la msingi naendelea kuwasisitiza mashabiki walianza na sisi msimu kwa nguvu na wamalize na sisi kwa nguvu ileile"
“Kazi yetu wachezaji ni kuhakikisha tunawapa mashabiki furaha, ikitokea matokeo hayajawa mazuri basi inakuwa ni bahati mbaya, hivyo tunazidi kujipanga na kujiweka sawa ili tumalize kwa ushindi mechi zilizosalia,” alisema Mwamnyeto
Kikosi cha Yanga kimeendelea mkoani Arusha tayari kwa mchezo unaofuata dhidi ya Fountain Gate ambao utapigwa Alhamisi, Juni 18 uwanja wa Sheikh Amri Abeid.
Baada ya mchezo huo Yanga itahamishia nguvu kwenye nusu fainali ya kombe la CRDB dhidi ya Azam Fc mchezo utakaopigwa Juni 21 uwanja wa CCM Kirumba mkoani Mwanza.
