Katika dirisha dogo Yanga ilifanya jitihada kubwa za kumpata winga wa Kimataifa wa Angola, Gelson Dala ambaye anaitumikia klabu ya Al Wakrah ya Qatar.
Mpango wa Yanga ilikuwa kuwasajili Laurindo Aurelio 'Depu' na Dala lakini walifanikiwa kumnasa Depu pekee.
Baada ya kukwama kumpata Dala, dakika za lala salama kuelekea kufungwa dirisha dogo, Wananchi wakafanikiwa kumsajili Buba Jammeh yakiwa ni mapendekezo ya kocha aliyeondoka Pedro Goncalves.
Goncalves aliwataka Depu na Dala kwa sababu ni wachezaji ambao alifanya nao kazi kwa mafanikio wakati akiinoa timu ya Taifa ya Angola.
Sasa mpango wa Yanga kumnasa Dala bado uko palepale na kuna uwezekano mkubwa akajiunga na mabingwa hao wa nchi kwenye dirisha kubwa litakalofunguliwa mwezi ujao.
Yanga na Dala walishafikia makubaliano kilichokwamisha mpango wa kutua dirisha dogo ni mchakato wa uhamisho wake kutoka klabu yake ya Al Wakrah ambayo kwa wakati huo haikuwa tayari kumuachia.
