Kiungo Khalid Aucho yuko ukingoni mwa mkataba wake na klabu ya Singida Black Stars.
Baada ya msimu huu kufika tamati, Aucho atakuwa mchezaji huru akikamilisha mkataba wake wa mwaka mmoja.
Unaweza kusema tangu kuondoka kwa Aucho kwenye kikosi cha Yanga, pengo lake halikuzibika.
Yanga ilimsajili Moussa Balla Conte ambaye alishindwa kupenya kwenye kikosi cha kwanza na kupelekea mabingwa hao wa nchi kumtoa kwa mkopo kwenye usajili wa dirisha dogo huku wakimchukua kwa mkopo Mohamed Damaro 'Ngosha' kutoka Singida BS.
Katika kikosi cha Yanga Duke Abuya kwa sasa ndiye mchezaji tegemeo eneo la kiungo cha ukabaji akisaidiana na Damaro ambaye hata hivyo kadi za mara kwa mara zinamfanya akosekane mara kwa mara kikosini.
Ni wazi Yanga itarejea sokoni kusaka kiungo mkabaji na jina la Aucho ni miongoni mwa wachezaji wanaotajwa.
Aucho aliondoka Yanga baada ya makubaliano ya kimkataba kushindwa kufikiwa. Alihitaji mkataba wa miaka miwili huku Yanga ikiwa tayari kumpa mkataba wa mwaka mmoja.
