Ligi Kuu ya Wanawake (WPL) inaelekea ukingoni huku Yanga Princess ikiendelea kusuasua baada ya leo kulazimishwa sare ya bao 1-1 dhidi ya JKT Queens katika mchezo uliopigwa uwanja wa Isamuhyo.
JKT Queens walitangulia kufunga na Yanga Princess ikasawazisha kupitia Jeanine Mukandayisenga.
Ni mchezo wa nne mfululizo Yanga Princess inakosa ushindi ikipoteza mechi mbili na sare mbili.
Imekusanya alama 44 ikiwa nafasi ya pili alama moja mbele ya JKT Queens inayoshika nafasi ya tatu. Hata hivyo JKT Queens wana mchezo mmoja wa kiporo.
Tayari mbio za ubingwa zimefika tamati kwani Simba Queens wametwaa ubingwa baada ya ushindi dhidi ya Mashujaa Queens wakifikisha alama 56.
Msimu huu Yanga Princess ilianza vyema msimu lakini unaweza kusema baada ya kupoteza mchezo dhidi ya Simba Queens ni kama bundi aliingia mitaa ya Jangwani.
Bila shaka maboresho zaidi yatafanyika pale dirisha la usajili litakapofunguliwa.
