Shoo za Star Boy Allan Okello zimeendelea uwanja wa KMC Complex leo akiingoza Yanga kuibuka na ushindi wa mabao 3-1 dhidi ya Namungo FC katika mchezo wa ligi kuu ya NBC.
Duke Abuya aliifungia Yanga la mapema dakika ya 26 kupitia shambulizi la kushitukiza kabla ya Namungo Fc kusawazisha kupitia Hassan Kabunda. Hadi mapumziko mzani ulikuwa sawa matokeo yakiwa sare ya bao 1-1.
Kipindi cha pili kilikuwa cha Okello alifunga bao la pili dakika ya 53 akimalizia mpira uliotemwa na mlinda lango wa Namungo Fc baada ya krosi ya Dube.
Wakati Namungo Fc wakitafuta bao la kusawazisha, alikuwa ni Okello tena kwa mara nyingine akifunga ndani ya 18 dakika ya 84 baada ya kumhadaa mlinzi wa Namungo.
Hilo lilikuwa bao la 11 kwa Okello sasa akiwa nyuma ya kinara wa mabao Feisal Salum aliyefunga mabao 12.
Ni rekodi kwa Okello kwani sasa amefunga katika mechi ya tano mfululizo akifunga mabao mawili katika mechi nne mfululizo. Mabao 9 ameyafunga katika mechi tano tu!
Wananchi wamerejea kileleni mwa msimamo wa ligi sasa wakifikisha alama 60 baada ya mechi 25.
