Ligi Kuu ya NBC inaendelea leo raundi ya 25 ambapo mabingwa watetezi wa ligi hiyo Yanga watashuka dimba la KMC Complex kuikabili Namungo Fc.
Ni mchezo mwingine muhimu kwa Wananchi kusaka alama tatu ili kurejea kileleni mwa msimamo wa ligi.
Baada ya watani zao Simba kuchomoza na ushindi wa bao 1-0 dhidi ya Dodoma Jiji jana, Yanga haipaswi kupoteza mchezo dhidi ya Namungo Fc ili kurejea kwenye nafasi yao.
Hautakuwa mchezo mwepesi kwa Yanga, historia inaonyesha mechi zinazokutanisha timu hizo huwa ni ngumu.
Meneja wa Habari na Mawasiliano wa Yanga Ali Kamwe amesema mechi hiyo ni kama 'dabi ndogo' akiwataka mashabiki kujitokeza kwa wingi kuiunga mkono timu yao.
Yanga leo itaingia kwenye mchezo huo bila ya kiungo wake mshambuliaji Pacome Zouzoua ambaye alipata majeraha ya goti katika mchezo uliopita dhidi ya Singida BS.
Hata hivyo mkufunzi wa Yanga Abdihamid Moalin amesema majeraha hayo sio makubwa sana na hivyo nyota huyo raia wa Ivory Coast atarejea dimbani mapema.
Mchezo huo unatarajiwa kupigwa saa 12:30 jioni..
